Ana Pontón: «Penso que no BNG imos romper moitos teitos no futuro»

susana luaña SANTIAGO / LA VOZ

ELECCIONES 2020

Ana Pontón, voceira do BNG, nunha imaxe tomada durante a entrevista Sandra Alonso

A voceira nacionalista cre que os galegos apostaron nas xerais polo voto útil, se ben ela pensa que ese voto non vai ser útil para Galicia

03 may 2019 . Actualizado a las 16:48 h.

Coa mágoa de non lograr acadar un escano nas xerais, pero satisfeita por ter dobrado o número de votos para o BNG, a súa voceira, Ana Pontón, prepárase para unha nova e dobre campaña electoral: a das municipais e a das europeas, que xa ten equipo.

Regístrate gratis y recibe cada mañana en tu correo las principales noticias del día

-Que faltou para acadar ese escano en Madrid?

-Sabiamos que era un obxectivo complicado pola polarización da campaña e polo medo da extrema dereita. Era complicado pero tamén era posible, o que pasa é que a estatalización da campaña e a política do medo penso que fixo que algunha xente acabara votando por un suposto voto útil, que logo creo que imos ver que no que se refire a Galicia non vai ser útil. Pero saímos reforzados cun BNG á alza, e o salto adiante vaise ver nas eleccións municipais e nas eleccións europeas, e con toda potencia nas galegas.

-Por que o nacionalismo non é quen de unirse como piden tantas voces?

-Nós temos as portas abertas a todas as persoas que leven a Galicia na cabeza e no corazón para construír unha alternativa sólida, e aí temos a man tendida. Está volvendo moita xente que marchara e tamén chega moita xente que nunca estivera, e nós traballamos para que este sexa o proxecto común de todos os galegos. E logo hai moito ruído mediático.

-Poderase romper ese teito que ten o nacionalismo?

-Penso que no BNG vamos romper moitos teitos no futuro. Estou convencida e ilusionada co proxecto, hai unha remontada moi potente e vamos seguir sumando coa man tendida para toda a xente que quere construír en positivo.

-Ana Miranda fíxose oír en Bruxelas cun escano compartido. Cal foi a clave?

-Fíxose un gran traballo e non foi un escano só do BNG, senón de Galicia, que lle dou voz a plataformas ambientais, ás vítimas de Angrois, ao sector do mar, ao agro... Un traballo moi importante recoñecido por todo o mundo e que estou certa de que vai ter o aval das urnas.

-Que vai perder Galicia sen voz propia en Madrid?

-Nós seguiremos traballando para defender os dereitos de Galicia en todos os ámbitos nos que esteamos e creo que a presión que fagamos desde aquí vaise deixar sentir tamén a nivel de Estado. É evidente que hai temas nos que as forzas estatais non van condicionar a política a favor de Galicia, pero nós vamos seguir traballando para defender o fin da estafa das peaxes da AP-9, unha solución para Alcoa, investimentos xustos para o noso país ou un novo modelo de financiamento no que Galicia non quede discriminada. E tamén sobre o debate territorial, porque Galicia non pode quedar fóra do tren das nacións.

-En cantos concellos presenta o BNG candidaturas?

-En 248 concellos, máis ou menos como nas pasadas eleccións. Nas municipais temos moitos puntos fortes; un deles, que os gobernos do BNG son exemplo de transformación e modelos nos que se producen cambios que realmente melloran a vida das persoas. Con ese aval imos dar un gran salto adiante.

-Pódese romper ese outro teito, o da maioría do PP en Galicia?

-Estou convencida de que o tempo de Núñez Feijoo como presidente da Xunta acabou, que Galicia vai apostar por abrir un novo ciclo no que o BNG vai ser determinante. Imos a por todas.

-E se entra Ciudadanos?

-Están nas antípodas do que representa o BNG. PP e Ciudadanos son dúas versións do mesmo produto, e o BNG non vai avalalo.

-Pactarán coa esquerda?

-Sabemos que hai que ter capacidade de diálogo, pero nunca vamos apoiar nada porque si.