Silleda, como socio do Fondo Galego de Cooperación, participa en accións de desenvolvemento de países pobres
24 ene 2019 . Actualizado a las 05:00 h.Os socios do Fondo Galego de Cooperación e Solidariedade, 97 concellos; entre eles o de Silleda, e tres deputacións, coñeceron nunha xuntanza celebrada en Barro o balance dos proxectos levados a cabo en países empobrecidos ao longo do pasado ano. Encontro ao que asistiu a concelleira de Benestar e Igualdade Pilar Peón.
-Que significa pertencer ao Fondo Galego de Cooperación?
-Traballar por e para as persoas máis desfavorecidas doutros países e para elo lévanse a cabo distintos proxectos en países do mundo.
-Cales foron as intervencións máis importantes do 2018?
-Na xuntanza que se fai todos os anos, unha en cada provincia, fálase dos proxectos feitos e dos que se intentarán levar a cabo. Ser socio do Fondo de Cooperación significa dar resposta a necesidades. Así o ano pasado despois do terremoto de Guatemala rehabilitáronse cinco vivendas grazas aos cartos dos socios, e neste caso tamén con aportacións de todos os silledenses. Todos os anos responsables do Fondo de Cooperación visitan os traballos que se realizan e coas axudas dotamos a dous orfanatos de Mozambique con lavadoras e cociñas que non tiñan. É importante saber a onde van os cartos e con esa aportación saber que estás axudando a que outras persoas teñan unha vida máis digna é unha satisfacción.
-Que proxectos teñen para este ano?
-Seguir traballando para consolidar o proceso de paz en Colombia, apoiar a oenegés galegas en Guinea Bissau e a través da Fundación Pedro Poveda colaborar con colexios de Guatemala na promoción da educación integral na sexualidade ao existir moitos problemas de violencia de xénero e embarazos en adolescentes e pre-adolescentes. É un proxecto financiado íntegramente con cartos do Fondo e dos veciños.