«Un mel bo é aquel que é natural, e en Lalín témolos»

amelia ferreiroa LALÍN / LA VOZ

LALÍN

miguel souto

Darlle cabida a todos, nun evento aberto tanto a profesionais como a profanos do mundo apícola, é a meta do evento en Lalín

07 abr 2022 . Actualizado a las 21:44 h.

A gran carpa do Cocido, instalada no campo da feira de Lalín, estrearase mañá coa celebración da primeira Feira Internacional de Apicultura Alvariza; que terá lugar os días 9 e 10. Dúas xornada cheas de actividades pensadas para todos os públicos, según avanza David Liñares; impulsor da iniciativa que promove o concello.

Regístrate gratis y recibe cada mañana en tu correo las principales noticias del día

—Con que expectativas nace Alvariza?

—A idea era facer unha feira de todos e para todos; con cabida para apicultores, produtores de Galicia e asociacións mesmo do noroeste da península, e penso que o conseguimos o contar con colectivos, laboratorios, empresas e representantes de Portugal, Austria, Grecia, Hungría e España. É unha feira para todos os públicos; para os que queiran ter contacto coa apicultura, coas abellas, para os nenos, os colexios e tamén para apicultores profesionais.

—Medra o interese pola apicultura?

—A curiosidade está cada ano máis en auxe pero dedicarse a isto profesionalmente é outra cousa... É un traballo de campo, duro, moi físico, de cargar os pesos das alzas e das colmeas... Normalmente están situadas en ladeiras de montañas con accesos difíciles, e logo as producións son moi inestables; un ano hai mel e outro ao mellor non. É complicado.

—O mel de Lalín é de calidade?

—Non nos podemos queixar. Son meles bos que teñen moito interese.

—Que se precisa para que sexa óptimo?

—Un mel bo é aquel que é natural, e en Lalín témolos. Logo canta máis variedade de flores teña máis rico será en vitaminas e aminoácidos. Das zonas de montaña saen bos meles, logo depende do gusto de cada persoa.

—Os showcookings servirán para ampliar o abano de opcións que ten o mel, e aplicado á cociña.

—Si o sábado faremos unha merenda san a base de produtos elaborados con mel, e o domingo haberá unha cata de meles da Indicación Xeográfica Protexida Mel de Galicia e outro showcooking ao mediodía dos que se ocuparán Patricia e César Galego. O mel xa non se usa só cando hai unha dor de garganta.

—Das ponencias, cales non deberíamos de perder?

—Ningunha (ri). Todas son interesantes. A que se centrará na diversidade dos polinizadores, a apicultura protectora da diversidade, a multiplicación do apiario, os marcadores xenéticos, polinizadores de cores ou a selección da abella negra ibérica...

—Arrancan cunha andaina.

—Ás alvarizas do Candán, unha maneira moi axeitada de abrir as actividades da feira.

Andaina abelleira, catas, relatorios e obradoiros infantís abren o programa

A primeira Feira Internacional de Apicultura de Lalín dará o seu inicio cunha andaina abelleira pola Serra do Candán, de 12 quilómetros, para ollar alvarizas e rematar cunha degustación de meles da zona. Pola tarde, ás 16.15 horas comezarán os primeiros relatorios; un a cargo do biólogo Martiño Nercellas que falará dos cen anos de fábrica apícola, e Luis Navarro abordará a diversidade de polinizadores (18.30 horas). Elia Pérez falará das bolboretas de día e de noite, e finalmente está prevista unha mesa redonda baixo o título de Apicultura protectora da biodiversidade. Haberá demostración en vivo dunha fundidora de mel e ás 18.15 horas Patricia e César Galego ofrecerán un showcooking no que o mel será o protagonista. A cativada poderá participar en varios obradoiros, que se estenderán de 16.30 a 18.00 horas, nos que comprobarán que os insectos tamén molan.