«A diversidade é enriquecedora e todos aprendemos de todos»

Despois de vinteún anos no colexio lalinense Xesús Golmar e corenta de traballo, María Jesús Froiz afronta unha nova etapa vital


lalín / la voz

No Ceip Seara en Moaña comezou a lalinense María Jesús Froiz Gil a súa andaina profesional como mestra. Agora, con máis de dúas décadas ás costas no colexio Xesús Golmar de Lalín, e corenta de traballo, deixa as instalacións do centro no que exercía de directora con motivo da súa xubilación.

-Chegou como maestra e posteriormente nomeárona directora.

-Cheguei ao Xesús Golmar no ano 1997, levo aquí pois vinteún anos. No meu primeiro nomeamento ocupei unha praza de Educación Infantil, exercín de secretaria durante cinco anos e no ano 2007 nomeáronme directora, cargo que ocupei ata hoxe.

-Chega á xubilación oficial a fin de mes, por anos de servizo?

-Aínda que levo corenta anos traballando, a miña xubilación é voluntaria.

-O Xesús Golmar é o ceip lalinense que máis alumnos acolle, máis de 600, e no que se visibiliza unha ampla diversidade funcional en cativos. É un centro que soubo traballar a integración dende a aula?

-A integración é fundamental para todas as persoas e máis aínda para o alumnado, pois a través das relacións cos iguais aprendemos a resolver moitos problemas e a facérmonos autónomos, neste senso trabállase en todas as aulas e en todos os niveis e estase atento a calquera problema que poida xurdir, por se procede realizar algún tipo de intervención. Tamén se crea unha sensibilidade especial por parte do alumnado cara ás persoas con problemas, e todos aprendemos de todos, e todos saímos gañando, nese sentido a diversidade é enriquecedora.

-Centro que foi pioneiro na posta en marcha dun servizo de conciliación a través da Anpa. Como o valora?

-Hoxe en día sería impensable o funcionamento do centro sen ese servizo xa que permite a moitas familias dar solución a un problema sen resolver por parte da administración e que supoño que ten moito que ver coa baixa natalidade da nosa comunidade. Somos conscientes da angustia das familias para poder conciliar.

-Foi doado coordinar todo?

-Pasamos etapas de moito traballo coa construcción e traslado ao novo centro. Nada é fácil nun centro tan grande porque para estudar, consensuar e debater precísase tempo, e tempo fóra do horario lectivo, o que implica moitas horas que restas á túa vida privada.

-O mellor e o peor?

-O mellor as vivencias co alumnado que nunca deixa de sorprenderte, co profesorado e con toda a comunidade, o levantarte pola mañán pensando que no teu traballo estás a gusto e que é un traballo de todos. O peor foi o traslado do cole en plena Semana Santa, todo un reto!

«Sería impensable o funcionamento do centro hoxe sen contar co servizo

de conciliación»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«A diversidade é enriquecedora e todos aprendemos de todos»