«Escóitame é un proxecto no que darlle voz a quen canta»

Paula Sueiro, promotora da iniciativa, apuntou que haberá audicións en agosto na Casa da Xuventude de Lalín e unha gran gala final nas festas da vila, o sábado das Dores


lalín / la voz

A cantante lalinense Paula Sueiro Rodríguez acaba de poñer en marcha na vila unha novidosa iniciativa; Escóitame. Que a túa voz traspase fronteiras, un cásting local á procura das mellores voces da contorna.

-¿Como xurde esta idea?

-Estaba buscando desenvolver algo diferente e pensei en poñer en marcha un proxecto no que darlle voz a quen canta. Madurei o proxecto, presenteino no concello e semella que lles gustou. Estou moi emocionada.

-¿Cal será o desenrolo desta iniciativa?

-Para que a xente nos entenda, isto será como o programa de A Voz pero en versión caseira. Haberá audicións na Casa da Xuventude os días 5, 6, 12 de agosto e posiblemente tamén despois do día 15 onde estaremos tres coaches: Nelly, que é recanteira do Luar coma min, estarei eu e Rodrigo Ramos de Barrio Rojo de Lalín. Escoitaremos a todos aqueles que queiran vir a cantar, menores de 18 anos, prepararemos temas os mércores e iremos logo a interpretalos nunha gran gala final nas festas de Lalín, que será posiblemente o sábado na Praza das Pipas ou na Rosalía de Castro. Haberá multitude de premios e de sorpresas, un xurado que nos deixará coa boca aberta, e un primeiro gran premio que será a gravación dunha maqueta nun estudo por xentileza do Concello de Lalín. Agradezo de antemán a colaboración que se me está a prestar dende alí na posta en marcha e no desenrolo desta iniciativa. De non ser por apoios coma ese non se podería facer algo destas características.

-¿Que busca con este tipo de experiencia?

-Non pretendo ensinarlle nada aos rapaces. Non é un enfrontamento o que se busca senón que soñen e que disfruten desta paixón e que a vivan. Cando eu comecei con isto a verdade é que botei de menos este tipo de apoios e de empurróns.

-Novo proxecto que compaxina coa súa participación de recanteira no «Luar» representando á Costa da Morte, ¿como non aposto por ser a figura de Deza?

-É que vivo en Lalín cos meus pais que viñeron para aquí por cuestións de traballo pero a miña xente está na Costa da Morte e a terra tira moito. Non quero decir que non teña apego por Lalín pero o meu corazón pertence á Costa da Morte.

-Conta con apoios de moitos rincóns, feixes de mensaxes e de verbas de alento...

-Estou un chisco abrumada e alucinada. As mostras de afecto son moitas tanto en Lalín coma na Costa da Morte e agradezo todas e cada unha delas.

-¿Pensa vivir da música?

-Tento ser realista. A miña meta é ser xinecóloga e os estudos son o primeiro. Claro que a música é a miña paixón!.

paula sueiro rodríguez cantante

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«Escóitame é un proxecto no que darlle voz a quen canta»