?s afeccionados da zona ao deporte do balompé teñen esta tarde un importante punto de interese alternativo ao Lalín. Concretamente, en Sada. Alí, no campo do Rayo Sadense (17.00 horas) , o conxunto xuvenil do Sporting Estrada xógase o seu pase á segunda ronda da fase de ascenso á Liga Galega da categoría. Os pupilos de Pitu parten coa vantaxe do 2-0 que hai unha semana conseguiran en campo estradense, e confían en que esta diferencia lles sexa suficiente para acceder á seguinte eliminatoria, xa decisiva para o salto de categoría. O encontro de hoxe chega desgraciadamente inmerso na sospeita, ao non sancionar o Comité de Competición ao futbolista do Sadense que a semana pasada fora expulsado na ida. O retraso na recepción da acta do partido é a causa oficial. Por outro lado, o equipo infantil do Sporting Estrada iniciará mañá (11.00 horas) a súa andaina na fase de ascenso á Liga Galega en Negreira fronte ao Nicrariense.