Marino Lamas, faleceu un home vencellado ás terras de Deza


A pasada fin de semana chegounos aviso do súpeto falecemento de Marino Lamas Costa no seu domicilio de Vigo. Contaba 77 anos e deixa viúva e tres fillos, e unha morea de amigos alí por onde o levou a súa traxectoria profesional e persoal. Nado en Corcubión, a súa profesión de perito industrial transcorreu integramente na empresa Unión Fenosa, da que foi delegado en varias localidades galegas, entre elas a de Lalín e a súa comarca dende mediados dos anos 70 deica os 90 do pasado século.

Foi neste cometido cando coñecemos a Marino, daquela compañeiro do noso pai na empresa. Tamén na compaña do noso pai e outros recoñecidos veciños de Lalín formou aquela candidatura de Unidade Galega para as eleccións municipais do ano 1979, na que trataban de contribuír a que a nova democracia chegase ao Concello, colaborando os dous tamén, de xeito altruísta, coa organización da Semana Verde de Galicia de Silleda, que por aqueles anos comezaba o seu inusitado crecemento.

Unha faceta na que destacaba, malia non ser promovido dabondo, era na pintura. Pintaba para si e de cando en cando para agasallar aos amigos, sen ánimo mercantil nin exhibicionista. Os máis dos temas eran mariñeiros, lembranzas do Corcubión natal, de Marín, terra da súa dona, e de Vigo.

Por se estas razóns non fosen dabondo para lembrar e gabar a súa traxectoria vital nestas terras, aínda temos que mencionar o seu libro A enerxía dos ríos na comarca de Deza, que co patrocinio do Museo da Casa do Patrón e o Seminario de Estudos de Deza saíu no ano 2003, e que constitúe un amplo e documentado catálogo das centrais eléctricas que funcionaron nos seis concellos de Deza dende finais do século XIX, e unha detallada relación dos nosos emprendedores conveciños que Marino Lamas quixo rescatar do anonimato.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Marino Lamas, faleceu un home vencellado ás terras de Deza