«Concentrar servizos relixiosos non é castigar senón mellorar»

Nove curas, entre eles o lalinense Gil Mato, foron homenaxeados onte polos seus 50 anos de sacerdocio


lalín / la voz

Na festividade de San Juan de Ávila, patrono do clero secular, o Bispado de Lugo homenaxeou a nove curas na celebracióndas súas vodas de ouro sacerdotais; entre eles o lalinense David Gil Mato, actual párroco de Láncara.

Nado na parroquia de Santa María de Soutolongo, Licenciado en Sagrada Teoloxía Gil Mato tivo o seu primeiro destino en San Juan de Seoane do Caurel. Corría o ano 1969 e daquelas, lembra David Gil, «había moito que facer nun sitio no que só circulaban dous coches en todo o concello, sen camiños, sen servizo eléctrico nin auga corrente nas casas pero lembro con agarimo aqueles anos nos que existía unha forte unión e confianza entre familias e sacerdote. Creo que isto xa se perdeu». Da súa entrañable estadía sacerdotal no Courel rememora os dez anos que promoveu dende a parroquia colonias infantís ás Rías Baixas para mellorar o bocio dos cativos. «Era un mal endémico que había alí e levabamos un cento de nenos á praia para mellorar as súas doenzas, e tamén a ver o mar que era para eles toda unha novidade. Creo que agora o tema do bocio está erradicado alí afortunadamente». David Gil Mato exerceu tamén a docencia: foi asesor relixioso do centro de EXB de Seoane do Caurel e director do Instituto Teolóxico Lucense. Labores de docencia das que está na actualidade afastado, centrándose na parroquia de Láncara e oito máis da contorna malia a estar xubilado. «Mentras poida continuarei atendendo aos meus fregueses pero está claro que cada vez a poboación en termos xerais está máis envellecida e na igrexa, ao igual que se fixeron concentracións en escolas e na sanidade, hai que apostar por concentrar servizos relixiosos. Iso non significa castigar senón que é mellorar e hai que crear esa conciencia entre os fieis». David Gil Mato ten as súas costas 50 anos de sacerdocio e de vivenzas. «Fomos quenes de vivir un momento sumamente rico, do paso do burro ao avión e do candil á luz eléctrica. Fomos protagonistas desa evolución».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Concentrar servizos relixiosos non é castigar senón mellorar»