Despois de 36 anos na provincia de Lugo leva dende o ano 2008 en Deza, «nun achegamento á terra onde nacín»
10 may 2016 . Actualizado a las 05:00 h.Eliseo García Sanmartín será homenaxeado hoxe en Lugo, xunto a outros quince compañeiros de ordenación, por mor da celebración das súas bodas de ouro sacerdotais. Os actos programados dende a Diocese de Lugo na festividade de San Xoán de Ávila comezarán cunha conferencia titulada «Jesús de Nazaret en el camino teológico de J. Ratzinger» a cargo do decano de Teoloxía da Universidade San Dámaso (Madrid), Gerardo del Pozo Abejón, para seguidamente celebrar unha eucaristía na Catedral Basílica e posterior almorzo-homenaxe no Seminario Diocesano. Cincoenta anos de sacerdocio de Eliseo García Sanmartín que cumpre estando aínda ao fronte de seis parroquias lalinenses.
-¿Cal foi a primeira parroquia á que foi destinado?
-O meu primeiro destino, que foi no ano 1966, foi en Quintós de Cervantes na provincia de Lugo. Posteriormente dende 1968 e ata o ano 72 estiven en Lebozán e Zobra, en Lalín, e logo durante 36 anos estiven en San Xulián do Campo en Lugo. Cheguei alí no ano 72 e permanecín ata o 2008. A esa parroquia fun a sustituir a un irmán meu que veu das misións e morreu moi novo, con pouco máis de corenta anos. Foi unha etapa moi fermosa da miña vida sacerdotal. Foron anos de moito traballo. Posteriormente o señor bispo considerou que era momento de achegarme á terra na que nacín, que foi en Anzo (Lalín), e agora levo as parroquias de Anseán, Barcia, Cristimil, Gresande, Noceda e Vilatuxe. Antes tiña tamén Bendoiro e Prado; parroquias das que se acupa agora Marcos (Torres).
-¿A perda de poboación que tamén afecta ao rural se deixa sentir nos actos litúrxicos?
-A participación eucarística dominical segue sendo positiva. Temos comunidades que son moi participativas como Vilatuxe ou Noceda con presenza de 90 e 70 fieis aproximadamente en cada unha das parroquias.
-¿Algún proxecto importante que se vaia a materializar nalgunha das súas parroquias?
-A piques está de encauzarse un proxecto moi importante na igrexa de Vilatuxe. Trátase de cambiar a totalidade da cuberta do tempo. Xa están todos os permisos otorgados e está previsto iniciar os traballos a mediados do próximo mes de xuño. É unha igrexa na que tamén se fixo unha fermosa restauración do retablo maior que estaba en malas condicións.
-¿Un acto tamén para o reencontro?
-Imos estar dezaséis e lémbrome que nos ordenaramos un total de 31. A algúns tiven a ocasión de velos como a Julio Agra da Compañía de Jesús que está en Santiago, ou a Manuel Rodríguez que é bibliotecario do Seminario. Outros optaron por ser misioneiros... Iremos en procesión ata a catedral nunha xornada verdadeiramente especial.
eliseo garcía sanmartín cura de vilatuxe que cumpre 50 anos de sacerdocio
«Fíxose unha fermosa restauración do retablo maior da igrexa de Vilatuxe»