O SOL | O |
08 sep 2004 . Actualizado a las 07:00 h.O MUNDO ÁS veces xira a un ritmo algo distinto ao da propia sociedade, e con isto, refírome a algo tan sinxelo como a moda, xa saben, esa industria que por terras de Deza se respira por todos os recunchos. O caso é que estes días están a caer lóstregos, pero ata hai ben pouco -e algún aínda continúa- os escaparates lalinenses seguían con biquinis, sandalias e pareos. Coa falla que nos fai estes días un pareo, ¡como non sexa impermeable!. Eu podo comprender que o de colgar dos maniquíes abrigos de lá pode resultar un tanto deprimente, pero xa non queda máis remedio. Por se o das vidreiras das teas non fose suficiente, agora toca a colección primavera verán na Pontus Véteris. Pola pasarela pontevedresa desfilarán varias propostas «made in Lalín», algunhas delas sobre Silvia Fominaya, a de Sardá. Realmente para ser deseñador é imprescindible ter imaxinación, porque calquera crea un biquini caendo chuzos de punta, ou se colga un abrigo a trinta graos á sombra. Non sei quen terá máis mérito, os creadores, as modelos, ou o público que consegue abstraerse da climatoloxía. Sexa como sexa, sorte para todos.