O plantel e o corpo técnico do América Archi conxuráronse para tentar lavar hoxe (19.30 horas) o seu desastroso debú na Primeira Nacional B, saldado hai sete días cun duro correctivo: 11-2 contra o Ribadeo. O feito de disputar o seu primeiro partido como locatarios nesta súa nova categoría proporciónalles ós integrantes do equipo estradense un segundo aliciente á hora de medirse ó seu rival de turno, o Rías Baixas de Pontevedra. Poucas son as referencias que o adestrador do América Archi, Cao, dispón do seu contrincante. «A semana pasada derrotou 8-5 á Cantina de Ribadeo. Comentáronme que é un conxunto moi novo e sen adestrador, que se pecha bastante atrás e sae á contra. Penso que será dos da nosa Liga, a da permanencia». Ante a limitada disponibilidade de efectivos, o club de Tabeirós rematou fichando ó ala-pívot Andújar, ata o de agora a proba, co que deste xeito pasa a dispor de doce xogadores. Con el e coa recuperación de Rubén, Cao conta esta tarde co seu plantel ó completo.