Loïg Troel e Pedro e Xavier Etxnait impartirán cursiños de acordeón diatónico e txalaparta en Lalín
20 mar 2002 . Actualizado a las 06:00 h.O Conservatorio de Música Tradicional e Folque de Lalín celebrará cursiños de acordeón diatónico e de txalaparta. O primeiro deles que se desenvolverá este venres, de 11 a 20 horas, será impartido polo acordeonista do grupo bretón Skolvan, Loïg Troel. Este músico foi alumno do acordeonista Yann-Franch Perroches e amosará na capital dezá a súa técnica así como ritmos da súa terra como o gavotten, laridé, hanter dro, ronde e valses. O prezo do curso de acordeón diatónico é de 30 euros (4.992 pesetas) para os alumnos do Conservatorio de Música Folque e de 40 para os outros. O cursiño básico de txalaparta, instrumento vasco de percusión, está programado para este sábado e correrá a cargo dos músicos Pedro e Xavier Etxnait. As clases celebraranse en horario de 17 a 21 horas e o prezo do curso é de 12,5 euros (2.080 pesetas). Por outra banda, no Conservatorio Profesional de Grao Medio de Lalín comeza o vindeiro luns, e ata o día 28 de marzo, un masterclass de clarinete. As clases están dirixidas a un máximo de doce alumnos activos e impartiranse en horario de 10 a 14 horas e de 17 a 20.30 horas. O clarinetista holandés Lars Wouters, recoñecido pola crítica como un talento musical extraordinario a pesares da súa xuventude, será o encargado destas clases maxistrais. Lars Wouters acadou primeiros premios no Concurso Nacional Stichting Jong Muziektalent Nederland, Princesa Cristina, Guadeamus Prize y Residentie-orkest Prize e no Concurso Internacional de Televisión Jeunes Solistes de Bruselas. O concerto de clausura do masterclass de clarinete terá lugar o xoves, día 28, ás 20.30 horas no Auditorio Municipal.