O Concello de Lalín convoca o terceiro Certame de Fotografía Feira do Cocido no que poderán participar tódolos fotógrafos profesionais ou afeccionados que o desexen. O tema estará necesariamente vinculado ó evento gastronómico que se celebrará este domingo. Cada participante poderá enviar un máximo de seis fotos, con unidade temática ou non pero éstas deberán ser inéditas e non presentadas antes do certame. Segundo as bases, o tamaño da obra presentada nunca superará a medida do soporte, que será ríxido e cunhas medidas máximas de 40x50 centímetros. Por outra banda, os traballos fotográficos remitiránse ó museo de Lalín e o prazo de entrega dos mesmos remata ó 5 de abril. O Concello de Lalín establece tres premios: o primeiro é de 600 euros (99.832 pesetas) e será para a mellor reportaxe do Cocido 2002; o segundo é de 300 euros (49.916 pesetas) á reportaxe ou foto individual e o terceiro está dotado con 150 euros (24.958 pesetas). O xurado poderá otorgar algunha mención honorífica ou declarar deserto algún premio. As obras que resulten premiadas quedarán en propiedade do Concello de Lalín e cos traballos seleccionados farase unha exposición durante o Mes do Cocido de 2003 no Museo Municipal coincidindo coa entrega de premios ós galardonados.