O muralista ourensán amosa na súa cidade o seu proxecto «Pulpezas»
07 nov 2024 . Actualizado a las 15:02 h.A carreira profesional de Mon Devane (Ourense, 1985) está vencellada de xeito destacado ao seu traballo co graffiti e como muralista. Neste último terreo ten desenvolvido unha ampla traxectoria, que vai dende a súa participación en eventos e festivais de arte urbana por todo o mundo —Estados Unidos, México, Xamaica, Bolivia, Uruguai ou os Emiratos Árabes, entre outros lugares— á súa presenza no proxecto As estrelas do Camiño, iniciativa de Estrella Galicia desenvolvida no trazado do Camiño Francés, entre O Cebreiro e Compostela. E polo medio foi deixando a súa pegada por toda Galicia: dende o traballo sobre o actor Chechu Salgado en Ourense á súa obra na Casa Labrega de Puxedo (Lobios).
No 2023 Mon Devane creaba o Eloi Devaneiro, unha escultura para os premios que concede o Ourense Film Festival (OUFF) aos novos creadores, e anunciaba a súa intención de seguir incidindo nesa liña de traballo. A nova etapa xa chegou e ten nome propio: Pulpezas, a mostra que se inaugurou na tarde deste mércores no Centro Cultural Marcos Valcárcel de Ourense. Oito esculturas —resina, esmalte e verniz— e oito cadros —spray, acrílico e óleo sobre liño— compoñen este proxecto que toma ao polbo e os seus tentáculos «como inspiración, marca e identidade».
«Tiña gañas de abrir unha nova etapa no meu traballo, xa o anunciara cando fixen a peza para o OUFF, e o que propoño neste proxecto é unha mestura de conceptos. Hai referencias ao que teño feito nestes anos e polo que se me coñece —e aí está o máis básico, como letras ou tags propios do graffiti— e ao mesmo tempo á cerámica tradicional galega, que é algo polo que sempre tiven paixón e que se reflexa nestas esculturas», sinalaba o autor nas horas previas á apertura da mostra.
A tradición e as marcas de referencia na creación galega tamén son aspectos destacados á hora de falar da orixe de Pulpezas: «A min sempre me gustou a cultura tradicional galega, as figuras de Sargadelos, Galos ou Regal —entre outras— e as referencias a oficios tradicionais e costumes. E nestas pezas que toman ao polbo como referencia fun creándoas de forma individual, moldeando unha a unha e intervindo despois sobre elas». Entre os aspectos que destacaba Mon Devane da súa mostra no Centro Cultural Marcos Valcárcel é que esta exhibición está chamada a converterse nun punto de inflexión na súa carreira. «É a miña primeira exposición, faise nun centro cultural de relevancia e, por riba, na miña cidade».
Devane foille dando forma ás súas propostas en colaboración cun deseñador gráfico e de aí saíron as pezas iniciais en resina. «Nunha segunda fase chegou á vandalización por medio do graffiti. Pulpone, o meu alter ego, foi o encargado de realizar a intervención. Tanto nas esculturas como nas pinturas. E o resto é polbo á feira».
O artista compaxinará a partir de agora a creación de murais co traballo de estudio.