Galicia lembra a Luz Pozo Garza cunha mostra, traballos editoriais e música

Emma Araújo SANTIAGO / LA VOZ

CULTURA

A poeta Luz Pozo Garza, retratada na súa biblioteca en setembro do ano 2013. César Quian

Os actos do centenario da poeta comezan en Santiago o 9 de xuño

25 may 2022 . Actualizado a las 05:00 h.

Luz Pozo Garza (Ribadeo 1922-A Coruña 2020) non puido ter mellor nome para reflectir o que supuxo a súa obra e o seu traballo para a poesía e a literatura galega. Por iso, co gallo do seu centenario, Galicia quere lembrala cunha programación de actos á altura do seu legado e na que tivo moito peso a súa familia e as persoas que máis a coñeceron.

As actividades propostas, das que en xaneiro xa se avanzara unha exposición, inclúen unhas xornadas académicas e un concerto no que músicos de corda da Orquestra Sinfónica de Galicia tocarán doce pezas compostas sobre textos da súa obra Sol de medianoite e que contarán co acompañamento dunha mezzosoprano. Precisamente, esta actuación farase coincidir coa data do seu nacemento, o 21 de xullo. Será no Auditorio Fontán, en Santiago.

A primeira iniciativa para lembrar a Pozo Garza será a exposición Constelación Luz. Luz Pozo Garza (1922-2022). Poesía, arte e vida, a inaugurar o vindeiro 9 de xuño. Comisariada por Olivia Rodríguez e organizada polo Arquivo de Galicia, recollerá información sobre a súa vida, obra, traxectoria e achegas á cultura galega. Contará con pezas persoais que precisamente foron doadas pola propia escritora no ano 2016 e que forman parte dos fondos artísticos e bibliográficos que custodia a Cidade da Cultura. E non só iso, xa que con esta mostra cúmprese o desexo de Pozo Garza para darlle uso e contido ao seu traballo. A exposición, que vai estar aberta na entrada do edificio da Biblioteca e Arquivo de Galicia ata o 17 de outubro, está estruturada en dez vitrinas que farán un percorrido pola súa vida, pensamento e literatura.

Tamén haberá un traballo para documentar o resultado do proxecto no que participarán Carmen Blanco, Xesús Alonso Montero, Xosé María Álvarez Cáccamo, Antonio Deaño Gamallo, Víctor F. Freixanes, Pilar García Negro, Aurora López, Olga Novo, María Novo, Manuela Palacios González, Andrés Pociña, Armando Requeixo, Claudio Rodríguez Fer, Olivia Rodríguez González, Mónica Vázquez Porto e Darío Villanueva. Moitas destas persoas forman parte do comité científico desta programación.

A homenaxe a Luz Pozo tamén terán proxección no tempo, xa que o Centro Ramón Piñeiro publicará a edición facsimilar da revista Mensajes de poesía, dirixida no seu tempo por Eduardo Moreira coa participación decisiva da autora luguesa. Esta reedición rescata un dos traballos máis importantes da Galicia da posguerra, xa que no seu día acolleu textos de poetas como Vicente Aleixandre, Álvaro Cunqueiro, Carmen Conde, Pura Vázquez, Ánxel Fole ou Blas de Otero, entre outros. Esta recuperación é froito das investigacións de Luis Alonso Girgado, Armando Requeixo, Tamara Andrés e Manuel Naveira.

Toda a programación para divulgar a importancia de Luz Pozo Garza, que formou parte da Real Academia Galega como membro numerario desde 1996 e do Centro PEN de Galicia, disporá dun espazo dixital aloxado no dominio cultura.gal. Tamén haberá unha pegada audiovisual grazas ao traballo de Rosa Taboada, autora do documental Na procura da luz, que achega un percorrido pola vida e a obra de Luz Pozo con testemuños de persoas moi próximas á escritora, que na súa dilatada traxectoria literaria foi recoñecida con distincións, entre outras, como os premios Tomás Barros de ensaio (1990), a Medalla Castelao (1995), Laxeiro (2014) e Trasalba (2019).

Tamén foi nomeada no ano 2018 filla adoptiva de Viveiro, localidade á que chegou con sete anos e á que volveu en 1940.