Feiras


Unha feira, ademais de ter outras moitas acepcións, é unha reunión periódica de xentes e comerciantes nun espazo público coa finalidade de mercar, vender ou intercambiar produtos. Desta volta, voume centrar no encontro social e periódico, pola enorme importancia que tiveron e teñen en Galicia este tipo de eventos, aínda que hoxe en día o concepto xa se estenda a un moi amplo espectro de variedades: feira do libro, da informática, de maquinaria, as medievais e por suposto as gastronómicas, que xa se converteron en todo un fenómeno turístico.

As feiras tradicionais de produtos de proximidade, con orixe no medievo, son lugares de encontro e mercado moi interesantes, nelas pódese mercar calquera produto da terra, gando, roupa, utensilios ou calquera chilindrada, tamén se pode facer un estudo antropolóxico das xentes do lugar e por suposto xantar, e aquí o polbo e as carnes mandan con claridade. En Galicia hai feiras e mercados todos os días da semana, aínda que se concentren maiormente de xoves a domingo. Quizais as máis importantes por antigüidade e afluencia sexan a impresionante Feira de Santos en Monterroso cada 1 de novembro e á que se podo non fallo; e a de As San Lucas en Mondoñedo que se celebra a mediados de outubro co gando montaraz como protagonista principal. Un evento que noutros tempos chegou a durar ata 15 días. Na miña contorna hai varias pero quizais a que máis me guste sexa a que se celebra cada primeiro e terceiro domingo de mes na localidade larachesa de Paiosaco. Nela habilítanse distintos postos con produtos do campo de boa calidade e a moi bo prezo e tamén conserva a base da esencia destes encontros tradicionais.

Todos sabemos de que trata unha feira tradicional en Galicia e a maioría participamos nalgunhas con máis ou menos frecuencia. Penso que moitas delas deberían protexerse para que non perderan a autenticidade xa que dalgún xeito son unha boa medida de como está a situación do noso máis próximo entorno. Quizais nos últimos anos fosen desvirtuándose bastante pero aínda seguen sendo marabillosos encontros de humanidade dos que gozar. Vivan as feiras do país e as xentes que as manteñen vivas!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
12 votos
Comentarios

Feiras