Ás veces hai que crer nos milagres. Sempre que penso nunha revista como Grial, que persiste desde 1963 (case medio século), non penso só nos directores e colaboradores, penso, fundamentalmente, no elenco de lectores, ese grupo de letraferidos que a sosteñen e que a fan necesaria. Sábese que non son moitos pero son os suficientes para manteren vivo un órgano de expresión libre e esixente nun mundo cada vez máis hostil ou indiferente. Aínda me sorprende -e conforta- máis ter noticia de que Encrucillada. Revista galega de pensamento cristián segue a labrar o seu difícil eido desde que apareceu en xaneiro de 1977. Acaba de editarse o número 220, correspondente aos dous últimos meses de 2020, o que nos leva a pensar que existe un grupo non pequeno de lectores dos modernos postulados do cristianismo máis esixente. A continuidade e o feito de ofrecer, salvo algunha tempada, seis números cada ano, semella un milagre (e non por ser unha revista relixiosa).
Cantos católicos en Galicia, afeitos a invocaren a condición de tales, sobre todo se son de dereitas, consultan algún número de Encrucillada? A mesma xerarquía eclesiástica alenta ou promociona nas parroquias esta revista? Si sei de persoas, pouco crentes ou agnósticas, que consultan con interese determinados números onde son evidentes o rigor e a modernidade intelectuais.
Acaba de saír do prelo o 220 dedicado, en boa parte, a algo fundamental por previo: como ler o texto da Biblia, os «73 libros escritos ao longo de dez séculos, en distintos lugares e por autores de diferente procedencia sociocultural?». A esta cuestión responden os artigos de María García Fernández, Carmen Bernabé Ubieta e Andrés Torres Queiruga. O do noso gran teólogo finaliza deste xeito: «Aquel a quen Xesús nos revelou como Abbá: PaiNai de amor infinito...». A formulación «PaiNai» é conceptual, non concesión a unha moda político-gramatical moi presente.
Nestes ensaios hai algo máis, moi importante: os autores achéganse aos textos bíblicos cos criterios da crítica literaria especializada cando esta se pronuncia sobre textos non bíblicos de calquera época.