A árbore da vida


Toda a xente que me coñece minimamente sabe da miña paixón polas músicas de raíz, pola etnografía, pola simboloxía sagrada e tamén pola natureza. Na conxunción de todo isto podemos encadrar o simbolismo que ten a árbore da vida e os seus diferentes significados nas moi distintas culturas do mundo. Vivimos en Galicia, terra de árbores, algunhas milenarias e míticas que poderían contarnos a nosa historia con todo detalle. Terra de bosques impresionantes que día a día van sendo substituídos pola rendibilidade inmediata e curtopracista. Así e todo, o simbolismo da árbore da vida segue vivo e continúa aí a pesar de todo o maltrato que lle propiciamos á natureza. Galicia é un pobo con fondas raíces e penso que cada un de nós somos portadores do ancestral respecto á terra e o entender a natureza como parte esencial do que somos, igual que facían os nosos devanceiros. A árbore da vida é unha das representacións da esencia da nosa existencia e calquera árbore sagrada podería representalo. Unha das súas variadas interpretacións di que as profundas raíces asentadas na terra significan o nacemento despois de botar a semente, o tronco vertical que medra reflexa o transcurso da vida e as múltiples pólas que apuntan ao ceo coas súas bifurcacións serían as decisións e os camiños que imos tomando a medida que o tempo pasa. Na nosa cultura, ata non hai moito, as árbores tiñan un gran valor porque proporcionaban moitos elementos de sustento esenciais de supervivencia como protección, alimento, leña ou madeira, e esa interrelación entre as árbores e a vida sempre foi ben entendida e tratada con sostenibilidade e respecto. Na actualidade e dende este progreso mal entendido vemos todo doutro xeito, o valor que as árbores tiñan noutrora foi desaparecendo e o seu carácter sagrado vai polo mesmo camiño. É por iso que día a día podemos ser testemuñas de arboricidios terroríficos que en algún outro lugar de Europa serían fortemente penalizados. Aquí parece que molestan e a consecuencia son as talas, sen preocuparse moito en mirar alternativas. Nese sentido acabamos co simbolismo a forza e o positividade benfeitora das árbores da vida, polo tanto imos camiño de os matar a nós mesmos. E así campamos!

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

A árbore da vida