Ollando o ceo


A incidencia da contaminación lumínica en Galicia non é tan agresiva como pode selo noutros lugares de Europa. O eixo atlántico galego dende Ferrol ata Vigo quizais sexa o mais iluminado, pero, con todo, este noso país aínda conserva a posibilidade, cando as nubes o permiten, de poder observar o ceo nocturno con certa limpeza.

Un dos agasallos que máis ilusión me fixo na miña infancia foi un telescopio electrónico que o meu irmán me trouxera de Suíza. Con el aprendín a mirar o ceo dende a miña terraza do barrio do Agra do Orzán na Coruña e saber distinguir planetas de estrelas, estrelas fugaces de satélites e algunha cousiña máis. Cando as xentes dos edificios lindeiros marchaban durmir e se apagaban as luces das casas saía eu co meu aparatiño e aí comezaba o momento máxico.

O ceo que eu vía era limitado polas estruturas das casas, mais por onde había un oco buscaba o xeito de facer a observación. Estaba pendente dos movementos dos planetas máis espectaculares como Saturno, Xúpiter, Venus, Marte ou a nosa lúa, que sempre me encantou poder vela un chisco máis de preto. Podía ver a Saturno cos seus aneis e algunha das súas lúas, igual que a Xúpiter coas súas características manchas e varios dos seus satélites, a Venus tan brillante e próximo, igual que ao enigmático e vermello Marte. Pero a lúa cos seus cráteres e os mares que marcan a súa superficie parecíame espectacular.

As estrelas en xeral prefería observalas a simple vista, tentar recoñecelas e situalas en cada época do ano. E cando ía á aldea ou a lugares con pouca luz pasaba horas vendo como todo iso se ía movendo diante dos nosos ollos. Impresionante!

Teño visto con claridade en varias ocasións o trazo da Vía Láctea, emocionante e sobrecolledor, e si, tamén moitos ovnis, obxectos voadores non identificados. Cousas ben estrañas das que non podo dicir que fosen naves tripuladas por seres doutros lugares do universo, pero si luces na noite e en movemento que non sabería identificar. Sigo mirando para o ceo con frecuencia e aínda me sigue fascinando. Creo que non sabemos o afortunados que somos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
7 votos
Comentarios

Ollando o ceo