Vari Caramés afonda nos recordos

O fotógrafo ferrolán presenta na Fundación Luis Seoane o seu traballo «Lugares», que analiza a estreita liña entre a realidade e a memoria

X. F.
La Voz

O escritor xaponés Haruki Murakami escribe no seu libro Tras do solpor que «para as persoas, os recordos son o combustible que lles permite continuar vivindo». As lembranzas tamén son a cerna da exposición fotográfica Lugares, baseada no fotolibro homónimo, do artista Vari Caramés. A mostra pode contemplarse este mércores na Fundación Luis Seoane ata o próximo 27 de outubro.

A exposición componse dun conxunto de trinta fotografías en cor que esvaecen o lindeiro entre realidade e memoria. As imaxes enmárcanse «na fronteira ou límite no que as cousas se poden mesturar e interpretar como unha especie de soño ou de existencia evanescente que contemplar», en verbas do fotógrafo ferrolán.

O mundo onírico que presenta Caramés insírese dentro de lugares que visitou con amigos ou, particularmente, coa súa muller Ángeles, finada recentemente e a quen dedica esta mostra. Neste senso, o artista galego parafrasea á cantante Chavela Vargas para describir o emprazamento das súas fotografías: «Un sempre volve aos lugares onde amou a vida».

Tornar a un tempo pasado ou visitar un sitio de novo é un síntoma de melancolía. Esta circunstancia preséntase en Lugares como unha maneira de fuxir da realidade, que, segundo Caramés, «é moi dura e recalcitrante». «Dicía Pessoa que a arte é útil porque nos saca de aquí -explica o fotógrafo-, precisamos un oasis emocional onde refuxiarnos, que non deixa de ser os lugares que un elixe para contemplar a vida doutra maneira».

O traballo de Caramés bebe «da poesía, da literatura, do cinema e da vida mesma», asegura. Así mesmo, o artista ferrolán considera fundamental a súa orixe galega na súa arte, condicionada pola «maneira de ver, pola paisaxe, polo clima e pola forma de ser dos galegos». Todas estas características compoñen un «crebacabezas», un «argumentario visual», que conflúen en Lugares.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Vari Caramés afonda nos recordos