Cuspe marelo


Os cativos en moitas ocasións poden ser crueis. Cando eu o era, os nenos, fóra do horario escolar, botabamos a meirande parte do tempo xogando na rúa. Formabamos unha manda heteroxénea e variopinta, na que os xogos fortalecían a nosa camaradería.

En Ribadeo, O Xardín era o noso territorio, e o resto de rapaces alleos a el que pasaban por alí, ou ben os ignorabamos ou, no peor dos casos, previo desafío, iniciabamos batallas, as máis das veces a croiazos. Pero lembro que un día apareceu polo barrio un rapaz do noso tempo cun cántaro de lata, co que cruzaba camiño dalgunha granxa da contorna a buscar leite. Ía e viña, sen máis.

Certo día que pasou a carón do noso grupo deulle por cuspir ao chan, e decatámonos que o seu cuspe era de cor marela. Trala sorpresa inicial, deunos por rir e deseguido un de nós empezou a abouralo chamándolle «Cuspe marelo...! Cuspe marelo...!». Ao resto do grupo deunos por sumarnos ao mantra e durante un bo treito seguímolo aguilloando coa ladaíña, mentres o rapaz, apouvigado, abaixaba a cabeza tratando de ignorar a nosa brincadeira.

O caso é que ao día seguinte volveu aparecer polo barrio e nós volvemos rodealo, ao tempo que insistiamos: «Cuspe marelo...! Cuspe marelo...!».

O rapaz tentou atallarnos botándose a correr, pero nós fixemos o mesmo e entre risas e moneos, seguímolo aldraxando.

A leria repetiuse varios días seguidos máis. Collerámoslle gusto, está claro, e non reparabamos no dano que lle faciamos. Un día, o rapaz tentou arredarnos, pero rodeámolo e volvemos teimar no noso enredo. O rapaz, case a punto de carpir, de socato berrou: «Non! Estou farto!», e deseguido cuspiu con forza no chan. Fixamos a nosa ollada no cuspe e vimos que era cuspe normal. Non soubemos que dicir. O neno ollounos desafiante e de súpeto dixo: «Ao próximo que me aldraxe doulle unha labazada! Mamóns!»

Botou a andar sen ollar atrás. Nos quedamos ollando para el sen saber que dicir. Nunca máis nos volvemos meter con el.

Argimiro Corral Acebo, A Coruña. Administrador de fincas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Cuspe marelo