Valle-Inclán e Monleón


José Monleón (1927-2016) foi o crítico de teatro que defendeu con máis tesón e convencemento o vangardismo dramatúrxico de Valle-Inclán, cando as obras deste autor aínda non gozaban de ningunha estima xeralizada. Monleón arroupou as postas en escena dos anos 60 e 70, que foron as que cambiaron o destino teatral de noso gran creador, que pasou de ser cualificado de «irrepresentable» a converterse en «adiantado das vangardas», á altura de Brecht, Ionesco, Beckett ou Adamov. Deste xeito, un Valle-Inclán que non coñeceu o éxito teatral en vida, converteuse no primeiro e máis internacional dos autores españois modernos uns vinte anos despois da súa morte e malia a censura franquista.

No descubrimento teatral de Valle-Inclán haberá que citar sempre ao director de teatro José Tamayo e ao crítico José Monleón. Os dous souberon ver o enorme tesouro que había en obras como Divinas palabras, as Comedias bárbaras, Luces de bohemia ou as tres pezas dramáticas recollidas en Martes de Carnaval. A eles lles debemos a recuperación teatral do autor arousán. E é importante dicir arousán -ou galego da ría de Arousa- porque aí está a chave que permite abrir moitas portas de acceso á comprensión da raíz enxebre da súa obra. O propio Monleón decatouse disto cando viaxou a Galicia a finais da década de 1960 para descubrir a «atmosfera sensorial e social da súa Galicia». Alí estaba a paisaxe/paisanaxe asombrosa e reveladora que permitía entender «a propia agonía do escritor, a súa condición de Gatopardo galego».

Cando eu fun ver ao crítico para pedirlle un prólogo para o libro que escribimos hai dez anos Javier del Valle-Inclán e máis eu sobre a morte de Valle en Compostela, Monleón emocionouse e quixo relembrar aquela viaxe súa, porque, ao seu ver, naquel espazo orixinario estaban as chaves explicativas de todo o que foi Valle-Inclán e de como se foi cocendo dentro del a súa propia obra. Alí sentiu o alento das personaxes de Águila de blasón, Romance de lobos ou Cara de plata, pero sobre todo descubriu a orixe da enorme grandeza creativa de Valle-Inclán… e tamén a súa proximidade coa de Luchino Visconti.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Valle-Inclán e Monleón