Esther Gómez: «É unha ledicia que se metan na conversa»

A impulsora da librería Moito Conto concibiu un dos espazos literarios independentes con máis carisma da cidade


A Coruña / La Voz

Entrar e sentir o impulso de ler, de coñecer historias. Esa é a maxia que conseguen espazos como Moito Conto. Cada andel invita a deterse e pasar as páxinas de títulos que as súas libreiras están sempre dispostas a comentar. Á fronte do seu equipo está Esther Gómez, nai desta tenda das palabras que se fixo un oco no microcosmos literario da Coruña.

-Con menos vida social polo covid, lese máis agora?

-A xente está lendo moito, confesan que len como nunca. Supoño que por varias razóns. A disposición do tempo de ocio é diferente. Por outro lado, creo que a xente tamén se está a refuxiar na lectura. Para uns ese refuxio é evasión, sen máis, para outros reflexión, ou ámbalas cousas. Aquí marcamos un bo verán. Cada ano que pasa, a xente tamén nos coñece máis, mesmo os que veñen pasar aquí uns días de vacacións.

-Primeiro o confinamento, logo a desescalada e os rebrotes, que case pechan a Feira do Libro da Coruña. Este verán que está a piques de rematar foi ben intenso.

-As librerías estamos moi afeitas á esixencia continua, aos cambios e ás crises. Este verán foi un pouco máis intenso que outros. Estamos aquí todo o día coa máscara, pero, cada vez que me dá moita calor, penso nos sanitarios.

-Superaron a fase dos ERTE?

-Desde o 11 de maio estamos todas reincorporadas e deixamos o ERTE. Somos un equipo de cinco persoas. Dúas a tempo completo, unha a media xornada, eu que son autónoma e unha colaboradora externa para momentos de apuro.

-O encerro fixo que se valore máis o comercio local?

-Cando estabamos confinados non nos solucionaba o día a día coller o coche e marchar ás aforas a comprar uns panos de mesa ou unha tixola. Algo que nunca me entrará na cabeza. Volvemos a ver o comercio local como persoas que lle dan vida á cidade, chaman ao cliente polo nome, míranlle á cara.

-Volverán os eventos culturais a Moito Conto?

-Fixemos un par de presentacións en xullo, cando aínda non había rebrotes. Unha de Kalandraka e outra de Anagrama, pero non temos proxectado facer de momento máis actividades culturais na librería. Só participamos nunha iniciativa coa escritora Brenda Navarro e Dores Tembrás en outubro. Agora mesmo non ten sentido, é o momento de activarnos con outras vías.

-Pode unha librería incrementar o índice de lectura na súa zona de influencia?

-A xente descubriu que lle gusta o que nos gusta a nós, falar de libros, non só que cho recomende un algoritmo, gústalle falar do que leu e do que le, das súas sensacións. Tratamos de crear unha rede de lectores, esta non é unha librería de paso. Hai que vir ata aquí e entrar, non é unha tenda que pases por fóra e digas, «ah, vin no escaparate…». Aquí sempre se está falando de libros, e creo que as librerías teñen que ser iso. En Moito Conto temos clubs de lectura improvisados continuamente! Sempre é unha ledicia que a xente che pida desculpas e se meta na conversa cando estás charlando con outro cliente.

-Como é o libreiro perfecto?

-Temos que vivir con entusiasmo e ilusión o noso mundo. O tempo dos libreiros constrinxidos e co ceno engurrado pasou, por moito que saiban de fondo de libros. Estamos en certo sentido obrigados a estar ao día se queremos vender.

-Hai, pode ser, exceso de novidades literarias cada mes?

-Hai moitas novidades, si, pero tamén hai moitos lectores diferentes. Setembro chega cargado, pero penso que é como todos os setembros e outubros, veñen as novidades fortes para o Nadal. O que pasa é que este ano o Nadal é tan incerto como a semana que vén. Vivimos a ilusión de vender libros no día a día.

Traxectoria. «Esta é una librería pequena e independente, un proxecto moi persoal. Cumpre seis anos en decembro pero levamos unha vida tan intensa que parece que levamos 20 facendo ruído», resume Esther Gómez.

Conoce nuestra newsletter con toda la actualidad de A Coruña

Hemos creado para ti una selección de noticias de la ciudad y su área metropolitana para que las recibas en tu correo electrónico. Descubre nuestro nuevo servicio.

Votación
1 votos
Comentarios

Esther Gómez: «É unha ledicia que se metan na conversa»