É informático, natural de Malpica e do ano 66. A súa vinculación coa política chegou a través das súas preocupacións sociais e preséntase como líder do BNG-Asembleas Abertas, pero sen carné. «Eu son independente», di.
-¿Cal é a base do seu programa electoral?
-O principal é conseguir a transparencia política. Agora no Concello hai paredes de formigón e queremos que sexan de crista. Queremos abrir o Concello á participación cidadá e conseguir tamén a normalización do mapa educativo no municipio.
-Supoño que fala do instituto.
-E de que hai un colexio no que se dan clases en barracóns, outro na casa do conserxe, outro que non acaba de arrancar porque non se cede a parcela...
-Vostedes xa estiveron no goberno. ¿Que aportarán de novo?
-No departamento de Servizos Sociais se fixo un bo traballo, pero quedaron proxectos a medias trala ruptura do pacto de goberno.
-¿Pactaría de novo?
-O PSOE expulsounos do pacto. Aínda esperamos que o explique. Non é un bo precedente. Con sete listas o mapa electoral é confuso. Hai múltiples casuísticas.