ENTREVISTA | Alcalde de Coristanco | A diferenciación do produto agrario é un dos principais retos da economía local
20 sep 2021 . Actualizado a las 05:00 h.A colleita de pataca deste ano é unha das maiores que se lembra. Confirma o dato o alcalde de Coristanco, Juan García, que considera que a diferenciación é fundamental para o principal produto do municipio. Pero este cultivo ten outros retos como son a innovación e a unión entre os agricultores.
-Que importancia ten a pataca na economía local?
-É esencial porque aínda no escenario máis desfavorable se plantaron 200 hectáreas cun custe de produción de máis de 3.000 euros. Supón entre 700.000 e 800.000 euros para a economía local. Son un montón de insumos que excede, e moito, ao propio produtor e probablemente en valor de mercado se triplique a cantidade. Pero o máis importante é a oportunidade que supón poder dedicarse a este traballo. Ten transcendencia tamén polo que representa de gasto no comercio local e no entorno e o valor para traer os recursos de volta cando venden fóra.
-Cal é o principal reto?
-A diferenciación nun mercado globalizado onde todo é prezo e non o pode haber sen unha identidade clara. A pataca de Coristanco ten características concretas como o secano, a recollida a man, a menor produción, unha variedade recoñecida... Outro reto é aplicar coñecementos, innovar e adaptarse ao mercado. Cambiaron as familias, son máis pequenas e os calibres máis grandes teñen máis dificultades para encaixar co que quere o consumidor. Tamén hai que compartir solucións e novas ferramentas. Cuestións como a intelixencia artificial ou a robotización estarán aquí antes de que nos demos conta e temos que estar en grupo e preparados.
-É un bo negocio?
-É un produto que se atopa no mercado dun xeito diferenciado e o consumidor segue optando por el. Hai un nicho importante na calidade e é algo que vai cada vez mellor. Hai mercados de volume nos que nós non podemos dicir nada porque son grandes latifundios. O que temos aquí é un microclima, unha variedade que ten valor, que a xente coñece, pero o máis significativo é que calquera persoa se pode dedicar a isto. É certo que nada é sempre igual e que os mercados van variando, pero mirando con amplitude hai moita xente que leva anos vivindo disto e pode vir outra nova.
-Por que é preciso ter unha marca propia?
-Todo o que sexa garantir ao consumidor que o que adquire vén de determinado territorio, que se recolle dun xeito especial, que hai un manexo do solo, sexa marca ou diferenciación é importante. A cuestión é que a pataca de Coristanco sexa recoñecible.
-Pero parece ser un proceso complicado.
-Hai que dar os pasos, estar convencido de a onde se quere ir e dar a batalla para lograr o que un ten dereito. Galicia é unha marca, ninguén o discute, vale moito en Madrid, pero quen coñece esta comunidade sabe que hai moitas diferenzas e ten que saber por que está a pagar un prezo adicional. Haille que garantir que o que compra vén de determinado territorio e iso é moi importante. Pasa cos pementos, hai que diferenciar os nosos dos que veñen de Marrocos. Tamén cos cítricos, que non son de Valencia, senón do norte de África, onde se poden utilizar produtos que hai tempo que están prohibidos en España. O consumidor ten que saber iso, que é o que hai en cada quilo de laranxas que compra. Débese explicar claramente porque é moi importante. Os organofosforados, por exemplo, non se poden utilizar aquí, pero alí si. Pasa o mesmo coa pataca. O consumidor ten que ter a liberdade de poder elixir e so pode facelo cunha etiqueta na que se lle explique todo. Dentro de Pataca de Galicia, por exemplo, está agora tamén a Agria, que é industrial e pouco ten que ver coa Kennebec, que tamén se pode atopar en Ourense e Valladolid e en nada se parece á de Coristanco.
