A industria para nós é esencial

Plumas con mando | Escribe Juan Manuel Rodríguez, alcalde de Cerceda | «Cerceda é un referente en infraestruturas, emprego ou servizos sociais», di o rexedor


Hai xa máis de catro decenios, o lignito mudou para sempre o escenario económico en Cerceda. Posteriormente asentouse a central térmica, Sogama, o polígono industrial e máis tecido empresarial. Pero para entender Cerceda, esa puxanza industrial por si soa non o explica todo.

Defendo sempre que o desenvolvemento pasa por un marco máis estreito ou máis ancho que dá para a actividade privada, pero tamén para o impulso das cuestións de interese público. Isto so é posible con puntos de encontro entre o lexítimo beneficio e a responsabilidade social. Un exemplo? O parque industrial do Acevedo é un lugar de amplo desenvolvemento industrial, pero localizado alí onde tamén se implantou o aquapark, o xardín botánico ou o centro de desenvolvemento tecnolóxico. Xérase emprego e riqueza, pero tamén se ofrecen atractivos para a xente.

Á hora de xestionar, hai que aproveitar o establecido e impulsar unha visión holística de sustentabilidade. A industria non está enfrontada co medio ambiente, co rural, co turismo nin coas cuestións lúdicas. Pensar iso sería o sinxelo. O complicado é atopar un camiño que aglutine todo, orientado en base a un equilibrio. Aí estamos. As alternativas contra este equilibrio que propoño son deixar avanzar a actividade privada sen buscar un aproveitamento para o conxunto da sociedade, ou ben rachar co establecido e pecharlle as portas ao crecemento económico e o emprego. Ambas opcións son moi distintas, pero coincidentes en que cada unha á súa maneira procede dos seus propios intereses particulares.

Nos últimos anos vimos asistindo a nivel estatal e autonómico a un grave desmantelamento do rural, que tamén desangra a moitos concellos na zona. Loitar contra iso pasa, en parte, polo emprego. Neste punto, a industria para nós é esencial. Pero tamén o é para que o Concello dispoña de recursos cos que dar servizo á veciñanza.

Dentro do peso demográfico de Cerceda, entendémola como un referente en infraestruturas, emprego ou servizos sociais. Pero o que hai que comprender é que iso é así en gran parte por ser tamén un referente a nivel industrial.

Á hora de buscar o desenvolvemento hai tres patas para un mesmo banco: protexer o medio, medrar economicamente e fomentar a cohesión social. É moi transcendente a disposición das empresas a esa responsabilidade social á que eu aludía anteriormente, pero igualmente importante fomentala dende as Administracións públicas, que somos en última instancia quen debe defender os intereses do conxunto da sociedade.

En Cerceda, particularmente, temos a sorte de contar cun modelo sustentado e estable ante os momentos de incerteza polos que pasa o país. Cremos que por aí debemos seguir traballando e mellorando, evitando dar paus de cego, e intentando percorrer sempre a canle da sustentabilidade. Ábrese un abano de dificultades, pero tamén de oportunidades. Somos un concello ben comunicado, que conta con potencial de ampliación de solo industrial e que tratará, por medio de procesos como os convenios de transición xusta ou os plans de axudas, de ter un novo impulso a nivel industrial e en oferta de ocio.

Por Plumas con mando juan manuel rodríguez

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

A industria para nós é esencial