Premios aos novos contadores de historias

Teatro, música e relato déronse cita na entrega dos galardóns do certame «Contos de Nadal»


Carballo / La Voz

O vento batía onte con forza nas fiestras do Centro Arqueolóxico Dolmen de Dombate, e a choiva mollaba a todo aquel que cruzaba ás carreiras o aparcamento exterior. Mesmo algún trono quixo facer acto de presenza ao longo da mañá. Non foi un día apracible, máis no interior do recinto foi premiado o esforzo de dez nenos da comarca que gañaron, coas súas imaxinativas historias e entre as 253 propostas, a décimo quinta edición do certame Contos de Nadal, convocado por La Voz de Galicia e Radio Voz, co patrocinio de EDP Renovables.

Le aqui os textos dos premiados no XV certame Contos de Nadal

Os textos íntegros dos 10 gañadores

Dez mozos recollerán esta mañá, no Centro Arqueolóxico Dolmen de Dombate, os seus premios ao proclamarse gañadores do XV certame Contos de Nadal. Velaquí os textos, íntegros:

A noite máis longa

Alberto Pérez Martínez

Primeiro premio dos Contos de Nadal 2018 | Alberto Pérez Martínez, do colexio Mar de Fóra (Fisterra)

Era unha noite de moito frío. A miña avoa miraba polo cristal da sala, e nós, dende a cama, preguntabámoslle se aínda non chegara. Ela camiñaba dun lado ao outro do corredor, nerviosa, e diciámoslle que se deitase, que cando el chegase quería vernos durmir.

En Noiteboa, na miña casa, todos esperabamos que chegase pronto a hora de velo entrar pola porta, coas súas botas grandes, a súa barba branca, a súa barriga grande e aqueles ollos azuis. Pero aquela noite de tanto vento, na nosa porta non chamaba ninguén, e as horas pasaban moi amodiño.

Seguir leyendo

O abeto

Isaac González Silva

Segundo premio dos Contos de Nadal 2018 | Isaac González Silva, do colexio Xesús San Luís Romero (Carballo)

Érase unha vez un abeto que habitaba nun bosque. Cando chegaba o Nadal, levaban aos seus compañeiros, pero a el nunca o collían, xa que dicían: «Non é ben feitiño! Ninguén o quererá para mercar!». Un día chegou un viaxante que decidiu collelo. Os encargados do invernadoiro dixéronlle: «Non serás capaz de vendelo! Non é ben feitiño!». «Non hai nada imposible!», respondeu o viaxante.

O abeto sentíase incriblemente feliz. Alguén o quería e se preocupaba por el. O dono púxolle unhas luces de Nadal e uns pequenos adornos navideños. Tamén lle colgou chuches de varias clases e cores para os cativos, e pequenas mensaxes de amor para os máis grandes en postais.

Seguir leyendo

Unha Noiteboa marabillosa

Gaizka Lago Elorza

Terceiro premio dos Contos de Nadal 2018 | Gaizka Lago Elorza, do colexio Manuela Rial Mouzo (Cee)

Brais vivía nunha casiña de pedra, ás aforas dunha vila mariñeira da Costa da Morte. Cando eran as sete da tarde, a noite xa chegara había un anaco, e tras as ventás podíanse escoitar os sopridos do vento e ver a choiva caer.

Como todas as tardes de inverno a nai e máis a avoa de Brais sentábanse arredor da lareira e pedíanlle á Virxe do Carme que protexese ao pai do rapaz, pois era mariñeiro e traballaba nun barco no Gran Sol. Brais xa estaba acostumado ás ausencias do seu pai, porque pasaba meses en alta mar sen vir á terra. Nestas datas próximas ao Nadal, o neno non podía evitar que o seu pensamento voase fóra da casa e chegara ata o barco no que se encontraba o pai. Como lle gustaría que papá fose como o boticario, que sempre estaba na casa! Ou coma o señor Manolo, que tiña un taller onde o mesmo arranxaba un arado que amañaba a roda pinchada dunha bicicleta!

Seguir leyendo

A maxia do Nadal

Luana Fondo

Cuarto premio dos Contos de Nadal 2018 | Luana Fondo, do colexio Labarta Pose (Baio)

O último día da escola antes das vacacións de Nadal, a nosa mestra de cuarto de primaria ordenounos como tarefa algo que debiamos facer en grupo, e consistía en Compartir.

E así foi como un sábado á tarde Gloria, Flor, dúas das miñas mellores amigas, e máis eu, reunímonos para pensar o que iamos facer. Decidimos coller algúns dos xoguetes que xa non utilizabamos e pensabamos que a outros nenos lles gustaría ter. Tamén mercar algún cos nosos aforros. Cando xa os tiñamos todos xuntos, envolvémolos e metémolos nun gran saco. A noite de reis fomos disfrazadas dos tres Reis Magos cantando panxoliñas e entramos por sorpresa nun centro de nenos refuxiados que había preto das nosas casas. Estaban todos reunidos nunha gran sala. Nós pensabamos que había vinte ou trinta nenos, pero había moitos máis. Quedamos abraiadas, sabiamos que non ían chegar para todos. Fomos repartindo os xoguetes aos máis pequenos e a explicarlle aos máis grandes o sucedido.

Seguir leyendo

Branquiño e a árbore de Nadal

Clea Martínez Rodríguez

Quinto premio dos Contos de Nadal 2018 | Clea Martínez Rodríguez, do colexio Alcalde Xosé Pichel (Coristanco)

Había unha vez un pequeno boneco de neve que se chamaba Branquiño e sempre tiña os pés moi fríos. Vivía no monte Picudo no medio de pinos e toxos cos seus catro irmáns. Cenoura ten por paixón recoller pedras do frío río! A Olliños de Bontón gústalle saír de paseo tódalas mañás de neve e xeada para mirar as follas das árbores conxeladas e brancas. Redondo é o pequeno dos irmáns, e sempre anda a buscar obxectos perdidos dos humanos. Laranxa leva na gorxa unha bufanda desa mesma cor que lle regalou o seu irmán Redondo. Por suposto, unha bufanda que atopou no monte! O Nadal está preto e os irmáns andan a buscar unha árbore para celebrar o Nadal ao seu arredor. Buscan un piñeiro grande, onde vivisen algúns animais do monte. De súpeto, Olliños de Botón botou un berro: «Encontreino! Aquel, no fondo do prado. ¡Aquel de verde máis escuro! E mirade, está habitado por unha familia de esquíos e un bufo».

Seguir leyendo

O trasno do Rei Mago

Anxo Andrade Vecino

Sexto premio dos Contos de Nadal 2018 | Anxo Andrade Vecino, do colexio Xesús San Luís Romero (Carballo)

Dise que na parroquia de Carballo hai un Rei Mago que nunca volve de volta a Oriente despois da noite de Reis. Sabedes o que fixo o último ano? Había tres amigos que lle pediran na carta un balón de fútbol, unha maquiniña e un coche teledirixido; cada un deles perfectamente identificado coa referencia do catálogo do centro comercial máis próximo. Ese trasno de Rei Mago, que pasa o ano na comarca de Bergantiños, botou o mes de decembro cambiando as referencias de tódolos xoguetes que aparecían nos catálogos que deixaban con publicidade nas caixas do correo dos portais dos edificios. Sabedes que lle pasou aos amigos de Anxo, Fabián e Noé? Pois que recibiron unha cociña, unha boneca e unha maleta de maquillaxe. Pasaron o día de Reis pensando onde estarían os agasallos que pediran. Co tempo foron vendo que grazas a ese Rei tiveran a oportunidade de darse conta de que non existen agasallos de nenas e de nenos. Dende ese día valoran a importancia de darlle aprecio a calquera xoguete. O trasno do Rei Mago ensinoulles que dá igual a cor que teñan os pasatempos dos catálogos. Gozamos por igual tanto coas páxinas rosas como coas azuis.

Seguir leyendo

Quen creou o Nadal?

Clara Pereira Otero

Séptimo premio dos Contos de Nadal 2018 | Clara Pereira Otero, do colexio Canosa-Rus (Coristanco)

Nun Nadal de hai moitos anos, tantos que nin o calendario se acorda, había unha familia que vivía nunha pequena casiña do bosque, e nela unha nena moi curiosa. Melisa sempre se preguntaba: «Qué é o Nadal? Como se creou?». Unha mañá, co xardín cuberto de neve, fixo un boneco e pensou para si: «Oxalá que o meu boneco de neve se faga real!». E así, e como por arte de maxia, fíxose real. A nena quedou pampa. «Chámome Botóns», falou o boneco, «¿Onde estou?». «Estás na miña casa, no medio do monte», respondeu a rapaza, que tivo unha idea: «Que tal se imos de aventuras para descubrir quen creou o Nadal?». «Xenial! Cando marchamos?», cuestionou Botóns. «Cando o teñamos todo», contestou a súa amiga.

Seguir leyendo

A viaxe

Ainara Cebral López

Oitavo premio dos Contos de Nadal 2018 | Ainara Cebral López, do colexio Xesús San Luís Romero (Carballo)

 Estas vacacións eran diferentes. Fórono dende o comezo. Era o primeiro ano que iamos pasar o Nadal fóra da casa. Tocaba viaxar, así que mercamos un billete de tren para a familia e todos puxemos rumbo a Madrid. Alí iamos visitar moitos lugares e gozar do ambiente navideño. Subimos ao tren, ilusionados, e cando levaba andando un bo anaco, a locomotora parou. Miramos polas fiestras e todo estaba nevado, non había nada nin ninguén. Saímos do noso vagón para preguntar qué sucedera. O revisor dixo: «Hai un fallo grande no motor, penso que non poderemos saír de aquí polo momento». «Pero mañá é Nadal!», dixemos. «Xa, pero hai moita neve e non poden vir rescatarnos! Estamos nunha zona de montaña inaccesible e, polo tanto, teremos que pasar aquí todo o día de Nadal», respondeu o revisor. Inesperadamente, e con gran imaxinación, empezamos a adornar o tren con motivos navideños, e ata na cociña se improvisou un menú para a ocasión. Era moi emocionante! Nunca vivira nada igual: o Nadal nun tren! Qué tolería! Os pasaxeiros fixéronse amigos, parecían case da familia e colaboraban para que todo estivese a punto. Foi o Nadal máis entrañable e divertido que vivín na miña vida.

Seguir leyendo

O regalo de mamá

Nuria Pena Trigo

Noveno premio dos Contos de Nadal 2018 | Nuria Pena Trigo, do colexio Canosa-Rus (Coristanco)

Hai moito tempo, un neno chamado Noel inventou o Nadal. Todo o mundo o quería coñecer ata que, un día, unha nena chegou a velo e preguntoulle: «Noel, que é o Nadal?». «É un día no que se reparten os regalos, felicidade e moitas cousas máis», contestou Noel á nena, que lle preguntou, á súa vez: «Esta noite virás á miña casa a traerme a mochila que sempre quixen?». Noel respondiulle que si, pero que tería que levar unha carta, e estar durmindo, ou senón non habería mochila. «Vale, fareiche caso», dixo a nena.

Seguir leyendo

A viaxe a Laponia

Mencía Moure Martínez

Décimo premio dos Contos de Nadal 2018 | Mencía Moure Martínez, do colexio Mar de Fóra (Fisterra)

Había unha vez, unha nena chamada Lara que vivía en Francia. Ela e a súa familia foron pasar as vacacións de Nadal a Laponia, á neve. O día de Noiteboa foron ao xardín e fixeron un boneco de neve cando, de súpeto, cobrou vida!

O boneco guiounos ata a fábrica de xoguetes de Papá Noel para axudarlle a empaquetar os agasallos. Preto de alí, nunha cova, vivía un malvado feiticeiro que lanzaba maldicións a través da súa bola de cristal. Así, converteu a Lara e á súa familia en bonecos Playmobil parlantes e, sen querer, un dos trasnos que envolvían os xoguetes, meteunos nunha caixa cun papel de cores navideñas e púxoos nun saco con máis paquetes para repartir.

Seguir leyendo

Seguir leyendo

Aos gañadores, procedentes de seis centros educativos da Costa da Morte, faloulles José Muíño, alcalde de Cabana, da súa propia experiencia na busca de contos e historias, de como se proclamou vencedor nun certame ben similar a este, e de como, aínda hoxe en día, lembra ese momento. «Eu estou aí sentado, con vós», dixo Muíño durante a súa intervención, antes de animar aos pequenos a «pelexar polo que de verdade importa» e a valorar esas pequenas cousas que, xa sendo adulto, «seguen marcándonos».

«Contade con nós»

Tamén Juan Rey, representante en Galicia de EDP Renovables, quixo felicitar o gran traballo dos alumnos, antes de reiterar o «compromiso» da Fundación que representa e ofrecer a súa colaboración para vindeiras edicións, visto o éxito desta última, na que se bateron todos os récords de traballos presentados. Algo máis de 250, para ser exactos, e de gran calidade, como quixo resaltar o director de La Voz de Galicia, Xosé Luis Vilela, que destacou especialmente a aparición reiterada nos contos desa figura familiar que se perde as ceas de Nadal por estar no mar. Fíxoo antes de enfundarse o traxe de contador de historias e rematar cun dos seus xa tradicionais contos a súa intervención. «A guinda que pon Xosé Luís Vilela cos seus contos creo que é xa unha marca propia destes premios», afirmaba o presidente da Deputación, Valentín González Formoso, ao rematar. Tamén quixo eloxiar o presidente do ente provincial a elección do lugar no que levar a cabo a entrega dos recoñecementos: «Gústame vir a este acto porque se respira ilusión, pero tamén polo espazo no que se desenvolve, pois Dombate foi sempre un lugar moi mimado pola Deputación, xa non só nesta etapa actual, senón historicamente».

Pero antes incluso de que os cativos recollesen os seus premios, a poeta e artista local Matilde Vilariño recitou o seu poema Kepa Junkera no dolmen de Dombate, no que fixo referencia á visita que o músico vasco fixo a Borneiro durante o verán. Vilariño, que hai uns meses enchía o auditorio cabanés na presentación da súa última peza, firmou varios exemplares do seu libro Poemas que non foron ó lume.

Pola súa banda, Tamara Lema e Yago Espasandín, con Eloy Mato ao acordeón, interpretaron a teatralización de O ladrón de soños, de Sabela Fernández Trelles, facendo as delicias dos pequenos. Un dos momentos máis divertidos da gala.

Unha viaxe musical

«Hemos tenido teatro, tenemos a los pequeños escritores, y ahora hablaremos otro idioma universal, como es la música, otra forma de imaginar. Tengo una voz muy fea, pero el violonchelo canta por mí», presentábase o músico Vladimir von Litvikh, antes de ofrecer aos asistentes un «viaje por la música»: de Bach ao ‘O Sole Mio de Pavarotti, pasando polo My Way de Frank Sinatra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Premios aos novos contadores de historias