Cada vez é máis difícil atopar relevo nas comisións de festas da Costa da Morte
19 ago 2026 . Actualizado a las 05:00 h.Estamos a ver por toda a Costa da Morte como cada vez se botan máis berros ao ceo en busca de relevo para as comisións que organizan as festas que logo todos gozamos como o que máis. Un labor que noutra época era do máis cool para os veciños e veciñas de cada localidade, pero que nestes tempos tornouse nun auténtico «marrón» para quen o asume.
Evidentemente, as obrigas administrativas, económicas e legais da máis mínima das festas son hoxe moito maiores que as que había. Pero non creo que esa sexa a causa principal deste desinterese. Esas apúntoas a dúas circunstancias: o pouco agradecido que é o inmenso traballo, e o difícil que é motivar a xuventude para que traballe polos demais.
Teño 31 anos e, pese a que xa hai quen quere eliminar aos da miña xeración dese amplo abano que demarca a xuventude, sei do que falo. Custa moito atopar persoas da miña idade nas comisións de festas, cando en realidade somos, década arriba e década abaixo, os que deberiamos tirar delas. E non porque non vaiamos cobrar ou porque non nos guste traballar, como moitas veces critican os maiores. Vai máis alá. Ese movemento colectivo, veciñal, estase a perder. E con el perderase solidariedade, tradición e, o máis importante, identidade.
Cada vez menos xente, e xa non falo só da mocidade, aporta para unhas festas cada vez máis caras. E o peor de todo é que esa parte da veciñanza adoita ser proporcionalmente a que máis se queixa. Por todo o exposto, sirva este pequeno xunte de letras para recoñecer a encomiable labor de tódalas comisións de festas.