As pezas de Daniel Doña e Daniel Rodríguez deixaron pouso nas vilas de Carballo e Vimianzo, respectivamente
06 may 2026 . Actualizado a las 05:00 h.Abril, o mes do Día Internacional da Danza, concluíu na Costa da Morte con dúas pezas de excepción. En Carballo, xa o día 30, El verbo, do coreógrafo andaluz Daniel Doña. «A danza é fráxil, é efémera, pero ten o poder de cambiar como vemos o mundo», deixou publicado a área de Cultura.
En Vimianzo, a cita foi con Transeúnte, de Daniel Rodríguez. Un espectáculo (imaxe que encabeza esta información) que acabou co auditorio vimiancés de pé. Música, canto, danza contemporánea, pero de trazos tradicionais, iluminación e tecnoloxía perfectamente conxuntados que fixeron curtos os 50 minutos da peza. Catro bailaríns e dous músicos perfectamente integrados provocaron unha gran conexión emocional e todo enriquecido coa voz de Aida Tarrío. O público puido gozar dunha función cargada de estética moi actual, pero, ao mesmo tempo, enraizada na tradición. Unha gran experiencia artística, unha especie de metáfora da nosa sociedade en transformación.