Axenda diaria | Cances e Oza, en Carballo, así como Vilaño e Cerceda, acollen propostas este 15 de xaneiro
15 ene 2026 . Actualizado a las 05:00 h.Hoxe • Asociación Adro de Vilaño e Cruz Vermella veñen de emprender unha colaboración para o impulso, por vez primeira, do programa Avós e Avoas Educadoras na Laracha. A iniciativa vai dirixida a persoas que teñen netos con idades entre 0 e 18 anos, sexan ou non de Vilaño ou do municipio. Hoxe daranse a coñecer os detalles, nun encontro previsto para as 19.30 no centro sociocultural de Vilaño.
Despois do parón do Nadal, doutra banda, o Concello de Carballo retomará hoxe un dos seus instrumentos de participación cidadá, os Consellos Parroquiais. O primeiro será esta mesma tarde, ás 20.00 horas, no centro social de Cances. Entrecruces e Goiáns acollerán os dous seguintes, tamén ás 20.00 e os días 22 e 29 de xaneiro, respectivamente. Ambos serán tamén nos correspondentes centros sociais.
Conversas do Rural sobre castañas, en Oza
Hoxe • Avanzará este xoves 15 de xaneiro o ciclo Conversas do Rural impulsado pola asociación Senda Nova. Coa sesión prevista para as 17.00 horas no Espazo da Natureza de Oza (Carballo), o convidado de hoxe será Manuel López Vilariño, secretario da Indicación Xeográfica Protexida Castaña de Galicia. O título da súa intervención: Unha IXP para todas as castañas de Galicia. Pode acudir á conferencia quen así o desexe.
Para aprender de alimentación e saúde, Cerceda
Hoxe • O viveiro de empresas de Cerceda acollerá hoxe, ás 11.00 horas, a sesión inaugural dunhas xornadas sobre a promoción da saúde que se estenderán ata o mes de xuño. As dúas primeiras combinarán teoría e práctica sobre alimentación saudable, o prato de Harvard, o planificador de comidas e o etiquetado tradicional. Logo da cita deste xoves, a seguinte parada será o vindeiro 29 de xaneiro.