Un tema moi concreto centra as coplas da coristanquesa neste 27 de febreiro. Así fala!
27 feb 2022 . Actualizado a las 05:00 h.Vou facer un exercicio,
e que o faga calquera,
propoñendo un pé forzado
e dicimos non á guerra.
Chegou un fillo de Putin
cos seus tanques pola terra,
nós non estamos conformes
e dicimos non á guerra.
Con regueifa ou sen ela,
hoxe todo o mundo berra,
temos unha cousa clara
e dicimos non á guerra.
Polo pobo de Ucraína,
que aos seus fillos enterra,
non queremos o conflito
e dicimos non á guerra.
Sexa Europa ou Palestina,
onde mísiles houbera,
non ficaremos calados
e dicimos non á guerra.
Mandatarios alocados,
que mal raio os comera,
este é o pensamento
e dicimos non á guerra.
Que alguén explique isto,,
se hai quen o entendera,
porque xa non ten remedio e dicimos non á guerra.
Que se poñan xa dacordo,
para que a paz volvera,
se queredes nós berramos
e dicimos non á guerra.
Deixo a mensaxe clara,
a regueifa é o que encerra,
se me fan caso cantamos
e dicimos non á guerra.
Traballamos coa palabra,
por se hai quen non se entera,
cando toca protestamos
e dicimos non á guerra.
O diálogo é o primeiro,
e a quen manda sen cabeza,
sinalámolos co dedo
e dicimos non á guerra.
Continuaría coas coplas
se máis liñas eu tivera,
rematemos este verso
e dicide: «NON Á GUERRA».