A auga cotiza


Nunha ducha, gástanse sobre cen litros de auga. Premer o botón da cisterna do baño, utiliza entre oito e dez litros. Lavar con despreocupación os dentes consome entre cinco e dez litros, ao minuto.

Dende primeiros de decembro, a auga cotiza, non coma un ben que se compre e venda, máis ben coma un dereito futurible para ir marcando prezos. Pensen vostedes que, para que isto ocorra na maior bolsa do mundo, debe de existir unha razón o suficientemente ambiciosa. O cambio climático, a contaminación e as secas, están a debuxar un mapa desolador.

Bolivia foi un dos países que tivo a súa propia guerra da auga, con seis mortos e 175 falecidos no ano 2000. Prevese que a escaseza paulatina do ben e os conflitos armados derivados desta problemática aumenten no próximo século. Pensen no transcendental do feito. O que poderían implicar as flutuacións dos prezos nos estados políticos dos países. Visualicen as Primaveras Árabes, a especulación sistemática dos alimentos e o trigo que deron orixe ás revoltas.

Cotizar a auga é coma poñer á venta o osíxeno que respiramos. Privatizar un ben escaso e poñelo a disposición de só uns poucos coa escusa ineludible da oferta e a demanda. En realidade, quizais levamos obviando un problema demasiados anos cando 2.200 millóns de persoas en todo o mundo non teñen acceso á auga potable, ou o que é o mesmo, 1 de cada 3 persoas no mundo. Cando esquivamos a realidade de milleiros de nenos que andan quilómetros con caldeiros ás costas para extraer auga turbia e con enfermidades como a poliomielite, a cólera ou a meninxite.

Quizais, un día abrir a billa non sexa un xesto tan sinxelo. O ciclo da auga remata cando as persoas interrompemos o ritmo da natureza.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

A auga cotiza