Tirar do mesmo carro


Ocolectivo profesional que traballamos no desenvolvemento local, normalmente en concellos, centramos a nosa actividade no ámbito operativo, non no estratéxico. Pero percibimos o lugar privilexiado no que nos atopamos para dar claves a quen toma as decisións en materia de políticas de promoción económica territorial. É por iso que, desde Afiprodel, intentamos achegarnos a experiencias que nos ilustren nesta materia. Neste contexto céntrase a viaxe á zona de Aldeias Históricas de Portugal programado con motivo do noso décimo aniversario.

Alí tivemos a oportunidade de achegarnos á evolución dun plan de desenvolvemento territorial impulsado desde instancias do goberno central hai uns 20 anos que tivo como piares o patrimonio cultural material e inmaterial de 12 núcleos con castelos. No momento actual estase desenvolvendo o plan 2020 enfocado ao crecemento verde e ao desenvolvemento sostible e intelixente que nace do territorio e complementa as accións anteriores.

Conta con tres eixos de especialización intelixente. Un deles céntrase na Investigación, o desenvolvemento e a innovación no turismo. Outro eixo vai enfocado á innovación rural, concretamente á valorización e á dinamización das cadeas de valor dos recursos endóxenos. E outro eixo está destinado á innovación territorial. Pola súa banda, os eixos transversais enfócanse na mobilización, a comunicación e a avaliación.

Ao igual que aquí, existen diferentes liñas de financiamento. Pero, o que conseguiron alí, foi que todas elas converxan na estratexia creada para a zona. Desa maneira non se perden esforzos e redunda no uso eficiente dos recursos sobre un territorio único de referencia. Isto fíxonos reflexionar sobre o que pasa en Galicia. Na Costa da Morte, por exemplo, solápanse varias estratexias. Temos un GDR para 17 municipios, dous GALP que o dividen e estase definindo un plan estratéxico para o xeodestino. Debemos loitar para que se definan plans únicos nos que converxan as achegas dos axentes locais e as axudas dos programas de instancias superiores. É posible e moi necesario que todos tiremos do mesmo carro e para o mesmo lado.

Autor Rosa Sánchez Secretaria de Afiprodel

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Tirar do mesmo carro