Os versos florecen en Cabana

O Concello e a editorial Galaxia desenvolverán en abril dous programas nos que participarán medio cento de profesores e 250 alumnos do municipio bergantiñán


O Dolmen de Dombate non só é o monumento máis representativo de Cabana, senón que dá nome tamén á colección de poesía da editorial Galaxia, así que con esta feliz coincidencia como coartada e o megálito como testemuña ambas partes acaban de poñer en marcha un programa educativo dirixido a profesores e alumnos, cos versos como fíos condutores e que se desenvolverá durante o próximo mes.

«Para nós é unha obriga fermosa apoiar toda clase de actividade que teña a literatura como eixo e este Dombate Primavera da Poesía interésanos e motívanos especialmente», asegurou o director da editorial, Francisco Castro, na posta de longo dunha iniciativa coa que espera, ademais, axudar a derribar algúns tópicos.. «Sempre se considera a poesía como a irmá pobre da literatura, que a edición de poesía non é rendible e que é un xénero moi minoritario, pero nós queremos reverter esa situación e unha das maneiras de facelo é traballando coas nenas e os nenos desde que son moi pequenos e se están iniciando na literatura». Nesa tarefa, contarán coa axuda de creadores como Xoán Carlos Domínguez, María Canosa, María Lires e Paula Carballeira, que impartirán os obradoiros escolares, nos que participarán 250 alumnos do municipio.

A outro eixo do programa Dombate Primavera da Poesía serán as xornadas para o profesorado, nas que participarán 50 docentes -as prazas xa están cubertas- e que terán tamén a destacados artistas como convidados: Ubú Teatro, que porá en escena a súa adaptación de A galiña azul, de Carlos Casares; Miro Villar, Manuel Ferreiro, Alberto Pombo, Yolanda Castaño, e Bieito Romero, líder de Luar na Lubre e moi vencellado a Dombate posto que, como lembrou onte Xosé María Varela -asesor cultural do Concello cabanés- a portada do primeiro disco do grupo estaba ilustrada cunha imaxe do dolmen. Varela explicou tamén que parte da sona inicial do megálito entre a intelectualidade compostelá debeuse ao poema que lle dedicou Pondal.

Agora, os versos volverán irmandarse da man do Concello e de Galaxia, editorial que o alcalde, José Muíño, cualificou de «referencia» e para a que tivo palabras de agradecemento.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Os versos florecen en Cabana