Imaxe de arredor de 1973, de Foto Blanco (segundo Xurxo Alfeirán Chouciño). Fotografía de gran forza artística, cun marabilloso equilibrio «renacentista». Moito se pode gozar e comentar dela pero non son profesional e podería dicir moitas tonterías. As liñas das miradas; o balanceo cara á esquerda do volume de personaxes, axudados pola costa abaixo do Piogo; o «contrapeso» do descomunal Olegario, e de Marcelino de Goiáns e José de Julia, grandes e pacíficos; o fiel da balanza en Caifás e Recho; as miradas dividindo ó grupo de 8 da esquerda: Frenxa, Michilín, Antonio de Graña e Evaristo do Botero (mirando para a cámara) e, mirando cara á dereita da foto, Sanjuán e Celestino da Mariana (de perfil) seguindo a conversación, Quirico ensimismado, e Chucho de Graña (tamén de perfil) coa mirada fóra da escena. Só quedan entre nós Jesús Graña Blanco e Evaristo Pombo Souto.
Temos moito que conservar en Malpica, e as fotografías tamén son unha gran riqueza cultural de moito valor para todos nós. Coma esta hai outras moitas fotos que non deberían perderse nunca, nin tampouco o recordo dos veciños que saen nelas nin quen foron.