«O cambio é necesario, e é bonita a alternancia»

Eduardo Eiroa Millares
e. eiroa CEE / LA VOZ

CARBALLO

Asegura que os socialistas dedicáronse a crear problemas, non a resolvelos

06 may 2011 . Actualizado a las 06:00 h.

Daniel Rego González (Camariñas, 1955) tentará por segunda vez de rematar coa maioría absoluta dos socialistas en Camariñas para levar ao seu partido, o PP, á alcaldía.

-¿Como valora os últimos catro anos de goberno local?

-Despois de 28 anos de gobernos do PSOE, o último foi un que non mirou para os problemas da xente, creounos, como fixo co PXOM ou coa casa de Man.

-O PXOM foi un asunto moi criticado polo seu grupo.

-Xa vimos como foi aprobado, correndo, convocando ao pleno 24 horas antes. Pero é que tampouco fixeron os polígonos empresariais, e o tanatorio quereno poñer nun espazo imposible. Crearon tamén problemas cos montes de Buría, que quixeron mancomunar, desmantelou Protección Civil, fixo as rúas incómodas e ata moveu un cruceiro sen permiso de Patrimonio.

-¿Algo a destacar en positivo dos últimos catro anos?

-Algunha cousa tamén houbo. Pecháronse os vertedoiros, e fomos un dos últimos concellos en facelo, e púxose saneamento e estacións de saneamento, aínda que quedan zonas pendentes, como unha parte de Xaviña.

-¿E que foi o peor?

-Os grandes problemas que creou á xente. Non se pode gobernar de costas aos veciños. O alcalde é un prepotente, e ademais ten que explicar que pasou cos seguros do Concello.

-¿Como foi o mandato na bancada da oposición?

-Os plenos non foron democráticos, senón pura ditadura. O alcalde non deixou nin falar. Pensa que ter a maioría absoluta permítelle facer o que lle dea a gana.

-¿Que propostas leva o PP?

-Nós vemos posible outra forma de gobernar. O cambio é necesario e a alternancia é bonita en democracia.

-¿Algunha actuación concreta?

-O máis importante hoxe é a creación de emprego, potenciar o turismo e as industrias do mar. Tamén consensuar un PXOM con todos, apoiar aos emprendedores, reducir a débeda a as decidacións, que son demasiadas.