O Concello lanza unha campaña para dar visibilidade aos servizos de proximidade
22 dic 2025 . Actualizado a las 19:02 h.O Concello de Muros acaba de lanzar a campaña Muros, onde vives, onde mercas, onde contas, unha iniciativa que busca poñer en valor o comercio local e os servizos de proximidade como pezas clave da vida económica e social do municipio.
A primeira acción consiste no reparto entre os negocios de pegatinas do Apalpador e de bolsas de papel. Segundo explicou a concelleira de Promoción Económica, Laura Rivadeneira, «queremos aproveitar esta época de moita actividade comercial para dar visibilidade ao pequeno comercio de Muros, e quixemos facelo apostando pola nosa lingua propia, o galego, e por unha figura da nosa cultura popular como é o Apalpador».
Pola súa banda, a alcaldesa, María Lago, destacou que o comercio de proximidade «non só é un espazo no que adquirir mercadorías, senón tamén unha actividade que dinamiza a vida nos concellos pequenos, cohesiona o territorio e achega valores engadidos que non ofrecen as grandes plataformas dixitais nin as grandes superficies».