María Xesús Blanco: A creadora da Pipi Calzaslongas galega

O seu personaxe chámase Rosalía, pero tamén é unha nena forte, valente e entusiasta


ribeira / la voz

Tiña escrito relatos sobre diferentes temas, algúns deles publicados no blog Café Barbantia, e tamén poemas, pero cando hai un par de anos se enfrontou a unha pantalla en branco, María Xesús Blanco viu con claridade a idea que quería plasmar. Ansiaba situar a unha nena como protagonista, unha rapaza forte, valente e entusiasta. Lera moita literatura infantil e quedara namorada de Astrid Lindgren, a creadora de Pipi Calzaslongas, e tamén lle deixaran unha fonda pegada outros personaxes como Matilda e Ana das Tellas Verdes. Unha visita coa súa familia á casa da escritora do Sar por excelencia redondeou o seu proxecto literario, bautizado como O caderno de Rosalía.

Aínda que a autora de Follas novas contribuíu a poñerlle nome á protagonista do primeiro libro de María Xesús Blanco, ela advirte que a súa Rosalía é unha nena do século XXI: «Na historia faise referencia á escritora e incluso hai unha visita á súa casa de Padrón, pero é só unha anécdota dentro do libro. Esta obra non ten nada que ver con Rosalía de Castro nin coa época na que ela viviu». Elixiu o nome porque pensa que transmite personalidade e fortaleza.

Evidentemente, a autora non quere desvelar o contido do libro, consciente de que teñen que ser os lectores os que se mergullen nas súas páxinas para descubrilo, pero si comenta que o argumento xira ao redor dunha nena que vai plasmando no seu caderno todo aquilo que lle acontece e tamén o día a día da xente que a rodea. «Algunhas destas vivencias son divertidas, pero outras non o son tanto, porque vai reflectindo a visión do mundo que a rodea», explica.

A Rosalía creada por María Xesús Blanco ten 11 anos e son polo tanto os nenos desa franxa de idade aos que vai dirixida a lectura, aínda que a escritora aspira tamén a enganchar aos adultos. Aos cativos busca transmitirlles forza, entusiasmo e espírito de superación; mentres que aos maiores quere amosarlles a visión que poden ter os nenos da realidade. Aclara que existe un fío condutor entre os 14 capítulos nos que está dividido o libro, aínda que non pode desvelar cal é.

Dobre visión

Como muller traballadora que é, María Xesús Blanco non pode dedicarlle á súa paixón pola escrita todo o tempo que quixera, pero a esta desvantaxe tamén lle sacou partido para lograr mergullarse no pensamento dunha nena desde dúas frontes: a de nai e a de mestra. Aínda así, e tendo en conta que a historia está ambientada na comarca, ela admite que é ficción pura.

Darlle forma ao texto custoulle pouco e superar o gran obstáculos dos escritores, atopar unha plataforma de lanzamento, tampouco a fixo sufrir moito. Francisco Castro, director de Galaxia, brindouse a apostar pola primeira obra desta melidense que reside desde hai máis de dúas décadas en Ribeira: «Leveime unha alegría enorme o verán pasado cando me deu a noticia».

Recoñece que esta aposta de Galaxia polo seu Caderno de Rosalía a empuxa a seguir escribindo, ao que tamén contribúe o estreito vínculo que ten coa asociación Barbantia: «Coñecer a xente deste mundo, como Manuel Cartea, tamén me anima a seguir loitando para buscar máis tempo que dedicarlle á lectura e á escrita».

Escribe practicamente a diario, polo que María Xesús Blanco ten no ordenador varias historias que están só pendentes dese pulido definitivo, un proceso que non é tan sinxelo como poida parecer: «Escribir historias non me resulta difícil, o complicado é despois profundar na linguaxe e comprobar que todo é coherente. Ao fin e ao cabo, eu son unha aprendiz neste eido». Semella que desta pluma barbancesa poden saír á luz nun prazo curto de tempo novos textos, tanto para nenos como para adultos.

A autora. María Xesús Blanco naceu en Melide, pero reside desde hai máis de dúas décadas en Ribeira. É mestra no CEIP de Olveira.

O libro. O cardeno de Rosalía é un volume de 112 páxinas. O texto inclúe ilustracións de Kristina Sabaite.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

María Xesús Blanco: A creadora da Pipi Calzaslongas galega