Rafa Fernández: Un músico entre o escenario e as aulas

Imparte clases e está de xira co seu segundo disco, «A cara bonita da pedra»


ribeira / la voz

Vive, como a maioría dos músicos, a cabalo entre os concertos e a docencia, pero a Rafa Fernández (Noia, 1983) non lle preocupa a duplicidade de empregos, ao contrario. Confesa que sente paixón, practicamente a medias, por ámbalas dúas actividades. Tanto é así que non dubida en asegurar que se conformaría con que o futuro fose igual ca o presente. Se ben é certo que agora mesmo está gozando da boa acollida que está a ter o seu segundo disco, A cara bonita da pedra, unha obra de jazz que gaña nos directos, a golpe de improvisación e dun engadido audiovisual.

Nesta ocasión, o noiés aliouse con tres músicos máis para formar un cuarteto que, sobre o escenario, conta coa colaboración de Iván Torres, un cineasta que proxecta imaxes de texturas, paisaxes e ambientes inspirándose nas composicións: «Aquí non é un espectáculo habitual, pero nos países do norte de Europa si. O audiovisual é un soporte moi importante para a propia música», explica Rafa Fernández.

Á orixinalidade que supón a introdución do elemento audiovisual súmase un repertorio que varía en cada actuación. A base son os temas do disco, todos compostos polo guitarrista de Noia, pero trátase de sinxelos esquemas que adquiren vida propia en cada concerto: «O jazz é improvisación pura ou dentro duns parámetros que ofrece a harmonía do tema. Neste proxecto quixen que tivera relevancia o conxunto». Neste sentido, asegura que os axentes externos tamén exercen influencia, explicando que non será igual a actuación que ten pechada para o verán no Courel con algunha que ofrecerá dentro de museos, cos que tamén está en contacto.

Este novo disco é unha continuidade do anterior, Rafa Fernández quinteto, publicado no 2013 baixo o selo da compañía elixida tamén para o segundo, Freecode. Supón un paso máis nunha traxectoria que o noiés empezou a debuxar cando tiña preto de 20 anos: «Sempre me gustara a música e tocaba a guitarra, pero non vira este mundo como unha saída profesional». Pero, desde que empezou, nunca tivo que buscar outro traballo: «Teño a fortuna de poder vivir da música e sen empregar a docencia como un comodín, pois concédolle tanto valor como ás actuacións».

Labor de divulgador

Como mestre, Rafa Fernández asegura que o seu obxectivo principal é trasladarlle aos nenos a paixón que en el esperta a música: «Máis alá de que lles guste, quero que a coñezan, porque moitos cativos non teñen acceso á música hoxe en día, debido fundamentalmente a un sistema educativo que a menospreza». Engade que lle gusta tamén empregala como medio para conseguir outros fins a nivel formativo: «Leva engadidos valores sociais, de autoestima e de responsabilidade. A música require un traballo regular que precisa dun sistema organizativo que pode axudarlle aos nenos no futuro».

Cando se converte en mestre, asegura que o instrumento e mesmo o estilo son o de menos. Tamén a nivel artístico, o noiés trata de fuxir das etiquetas: «Gústame calquera tipo de música; de feito, o que fago non é jazz puro, porque nunca me atrevería a sacar un disco de jazz, xa que é o estilo que máis respecto me infunde. A música é música, dá igual o xénero».

Sen embargo, del falan en diversos foros musicais coma un dos referentes do jazz feito en Galicia e refírense ao seu novo proxecto coma unha maridaxe artística que brinda unha experiencia única, a través dunha atmosfera sonora que interactúa con texturas visuais. Rafa Fernández acaba por recoñecer que, pasiño a pasiño, vai abríndose camiño: «Si estou con propostas interesantes en festivais de jazz e tamén pechando actuacións en museos para este ano». A cita máis próxima está fixada para o 23 de febreiro, no Portajazz da cidade lusa de Porto.

O músico. Rafa Fernández aliouse con Virxilio da Silva (guitarra), Álex Salgueiro (teclados) e Juan Cañada (contrabaixo). A eles súmase, nos concertos, Iván Torres, que proxecta imaxes inspiradas na música.

O mestre. O noiés imparte clases na Escola de Música de Muros e tamén en Musikartis, en Bertamiráns.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Rafa Fernández: Un músico entre o escenario e as aulas