Os pinceis que embelecen Rianxo

Son os autores dos murais que xa lle poñen cor ao auditorio e á zona de Xogo dos Bolos

.

ribeira / la voz

Hai aproximadamente unha década irrompeu en Galicia unha tendencia artística que está chegando con forza a Barbanza. Trátase de combater a fealdade que presentan determinados muros e paredes dos cascos urbanos con arte, mediante a elaboración de grandes murais. Son, na maior parte dos casos, obras que pretenden afondar na historia dos lugares elixidos, buscando así unha conexión directa cos veciños. Rianxo, a través dunha iniciativa promovida pola asociación Ondiñas Mainas, vén de sumarse a esta corrente artística. Lara Torres e Nove Noel son os artífices da transformación que veñen de sufrir unha das paredes do auditorio municipal e un vello muro situado na zona de Xogo dos Bolos.

Nove Noel xa leva unha década dedicándose á arte mural e no seu amplo currículo figuran anacos de cemento transformados en obras de arte en Ribeira, A Coruña, Santiago, Ordes ou Carballo; pero tamén deixou a súa pegada en Madrid e Barcelona e mesmo en Alemaña, México e Estados Unidos. Explica que todo comezou coa realización de graffitis: «Eu debuxo desde sempre e o paso dos anos foime levando cara un estilo de rúa moi concreto, movido tamén polos festivais de murais aos que me fun sumando e cos que fun medrando».

Para este creador rianxeiro, a realización de murais vai moito máis alá da recuperación dun espazo degradado: «Sempre me documento sobre a zona e sobre a súa historia, coa idea de que a obra estea vinculada co imaxinario tradicional do lugar». Para decorar unha das paredes do auditorio municipal, elixiu a temática mariñeira: «Quería volver ao pasado, a esa época na que o recheo no que se atopa este edificio era un mar no que traballaban os mariscadores».

Documentación previa

A súa compañeira de aventura, Lara Torres, está iniciándose neste eido artístico, pero faino con forza e moitas gañas. Despois de decorar o polideportivo de Catoira cunha obra que chama ao fin da violencia, mergullouse na historia dun lugar de Rianxo coñecido como Xogo dos Bolos para engalanar un muro cedido para a ocasión por unha veciña: «Descubrín que este nome vén dado porque no lugar se celebraban festas ao redor de torneos de bolos, nos que competían diferentes parroquias. Decidín darlle movemento a eses bolos, converténdoos en persoas danzantes que, a través da vestimenta, permiten facer un percorrido desde o pasado ata o presente». Completou a escena cun cabalo que lembra ver desde pequena nesa zona.

Tamén para ela estes muros decorados son moito máis que obras de arte na rúa: «Son ilustracións que transmiten información, que permiten lavarlle a cara a espazos feos e que tamén buscan conectar coa xente do lugar no que se atopan». Explica que, en días pasados, animou a algunhas persoas que se achegaron ata o seu lugar temporal de traballo a dar unhas pinceladas.

Tanto Nove Noel como Lara Torres confían en que esta iniciativa que promoveu Ondiñas Mainas teña continuidade no futuro. «Gustaríame realizar o vindeiro ano un proxecto de maior envergadura, reunindo a un grupo de artistas e brindándolle a oportunidade de sumarse a novos creadores», comenta a parte masculina deste tándem.

Nove non dubida en asegurar que xa ten en mente varios puntos nos que non lle importaría intervir: «Hai un muro de formigón que está en Tanxil que non me importaría transformar, ao igual que uns piares situados no paseo marítimo, onde está o Castelo da Lúa. Pero recoñezo que o meu soño é pintar un barco enteiro, sería incrible».

Lara Torres ten máis clara a temática que a localización: «Gústame pintar animais e facer retratos. Conxugar eses dous elementos en calquera espazo sería perfecto».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Os pinceis que embelecen Rianxo