Manuel Cartea: «O recompilatorio proba que seguimos aquí»

Asegura que a maquinaria está engraxada e roda ben, polo que lle augura unha longa vida ao suplemento


Aínda que será o venres, coma sempre, cando verá a luz un novo suplemento de A Voz de Barbantia, o 127, a cita mensual da asociación cultura adiántase nesta ocasión a mañá. Terá lugar en Noia e servirá para presentar o quinto recompilatorio, o que recolle desde a publicación 101 ata a 125. Detrás deste volume e de cada suplemento hai un equipo de traballo do que forma parte Manuel Cartea, que é un dos coordinadores.

-¿Que significado ten para Barbantia este recompilatorio?

-É o presente, o recompilatorio proba que seguimos aquí. O pasado serían os catro volumes anteriores e o futuro, o sexto, no que xa estamos a traballar.

-Semella que a traxectoria de Barbantia é imparable.

-De momento, si. A asociación está moi asentada, conta cun equipo de traballo extraordinario e tódolos seus membros coñecen os fins, os obxectivos perseguidos. Cando unha maquinaria está engraxada, non sen esforzo, as cousas rodan.

-¿A que atribúe o éxito deste suplemento?

-Ao éxito da asociación, que é un espazo de encontro, unha plataforma cultural supramunicipal e apartidaria, aínda que non apolítica. Ese carácter comarcal engloba a moita xente, intelectuais que precisaban dispoñer desa canle de expresión.

-¿Viñeron entón Barbantia e o seu suplemento a encher un oco que había na comarca a nivel cultural?

-No eido da cultura sempre hai moito que facer. É un eido ao que os organismos oficiais dedican poucos orzamentos, cando debería ser ao contrario, xa que a cultura tamén pode ser un elemento de dinamización económica.

-¿Cal é o principal obstáculo que tiveron que superar nesta longa andaina?

-Hoxe diría humildemente que non hai atrancos, pois a inercia xa nos impulsa. Se tivera que falar dun obstáculo, diría o económico, se ben é certo que imos obtendo apoios, tanto da Deputación coruñesa coma dos concellos da comarca.

-De cara ao futuro, ¿hai algún cambio no horizonte?

-Creo que non moitos. É certo que falamos da creación dun premio, quizais de ensaio, e tamén de potenciar o encontro de creadores.

-E no suplemento cultural, ¿hai algunha modificación en marcha?

-Se son para mellorar, os cambios sempre son benvidos, pero non é doado introducir modificacións neste suplemento, pois está moi estudado e sintetizado. Falamos de incorporar poesía, pero non é doado. Polo demais, as doce seccións existentes abranguen creo que tódolos aspectos da cultura que poden ser de interese.

-¿Ten predilección por algunha sección?

-Hai unha sección que é moi querida por todos: En obras, porque representa o futuro. É a oportunidade que lle brindamos á xente que empeza a escribir para que se faga ver. Non é un apartado no que abunden as colaboracións, ao contrario, pero imos saíndo adiante.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Manuel Cartea: «O recompilatorio proba que seguimos aquí»