agro galego conta coa sorte de ter na Estación Fitopatolóxica do Areeiro, da Deputación de Pontevedra, un centro de referencia internacional no que se refire a detección de pragas e enfermidades que afectan aos nosos cultivos e aos nosos bosques. Nos últimos anos, o centro que dirixe Pedro Mansilla ten ido sempre por diante dos problemas. As pragas e enfermidades son o noso maior reto, agronómico e forestal, especialmente cando falamos de cultivos leñosos, como os frutais, ou o forestal, xa que son cultivos que non se renovan todos os anos, e os investimentos fanse en plantacións que teñen que vivir durante anos con suficiente saúde e vigor para producir, froitos ou madeira.
Non esquezamos que a presente globalización na que estamos inmersos, multiplica o intercambio de bens e persoas entre distintas áreas e continentes do planeta, o que aumenta o risco de transportar de xeito accidental insectos, fungos, bacterias e todo tipo de patóxenos ou materiais contaminados, que entran fundamentalmente por portos e aeroportos a pesares das medidas de control. A lista de amezas que entraron en Galicia nos últimos anos non para de medrar, plantexando novos retos: o nematodo do piñeiro, o gorgullo do eucalipto, a tinta e o cancro no castiñeiro, a variedade de tinta que está a matar os ameneiros dos nosos ríos dende hai tres anos, ou máis recentemente o picudo das palmeiras, a avespa do castiñeiro ou a velutina. A nova praga africana da pataca e, agora, a psila africana dos cítricos son problemas que viñeron de moi lonxe, pero que están aquí para quedarse.
ONo caso da psila africana, a urxencia dos tratamentos para o seu control ven dada porque pode supoñer a vía de entrada en España da peor das enfermidades dos cítricos, a bacteria que este insecto transmite, e que podería producir a ruína do sector cítrico.
É preciso por tanto que os propietarios de limoeiros, laranxos, mandarinos e outros cítricos tomemos en serio as medidas para o seu control. Pero non é menos necesario, que Medio Rural poña os medios materiais, técnicos e de asesoramento precisos, para que poidamos vencer esta ameaza. De momento estamos a tempo. Pero quen ten a responsabilidade, ten que mover ficha de xeito intelixente e áxil.