Neixón xa é referente galego

A calidade dos relatorios e a cifra de asistentes serviron para consolidar o congreso organizado polo museo


O segundo Encontro Arqueolóxico do Barbanza desenvolveuse o pasado fin de semana no centro de Neixón cun éxito rotundo. A calidade dos relatorios que se puideron escoitar e a elevada cifra de asistentes serviron para consolidar a iniciativa e para convertela nun referente a nivel galego, sobre todo no relativo ao seu interese dende o punto de vista didáctico.

Tal foi a expectación que espertou o congreso que foi preciso incrementar o número de prazas previsto nun primeiro momento e fixado en 140. Finalmente foron 170 os participantes que tiveron a posibilidade de escoitar a ducia de charlas que conformaban o programa. Uns fixérono vendo en vivo aos relatores e, outros, mediante videoconferencia. Pero o centro de Neixón viuse obrigado a deixar fora a cen persoas que chamaron para inscribirse no encontro cando xa estaban ocupados todos os postos.

Os lugares de procedencia do público tamén axudan a consolidar o congreso como unha das citas máis importantes de Galicia no que a arqueoloxía se refire. Ata a localidade boirense de Neixón desprazáronse persoas de diversos puntos da comunidade, destacando a presenza de varios grupos procedentes das provincias de Lugo e Ourense.

Aberto a todos

Tanto dende o Centro de Interpretación Arqueolóxica do Barbanza como dende a Concellería de Cultura boirense, promotores da iniciativa, coincidiron en destacar a importancia que tivo o seminario a nivel didáctico. Argumentaron que en Galicia se celebran outros congresos importantes na materia, pero están dirixidos fundamentalmente a especialistas e non soen abrirse ao público en xeral.

Aínda que todas as conferencias resultaron interesantes, entre as que máis gustaron ao público atopáronse a de Xosé Pedro Rodríguez Álvarez, que falou do asentamento de Atapuerca, un referente a nivel mundial; a de Arturo de Lombera, referida ás primeiras ocupacións de Galicia; e a de Antonio de la Peña, que disertou sobre o papel dos afeccionados.

Os barbanceses que formaron parte do público deste encontro tamén tiveron a posibilidade de coñecer detalles sobre a escavación levada a cabo en Neixón, da que falou Xurxo Ayán; e das intervencións no castro de Porto Baixo, tema que tratou Miguel Ángel Vidal.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Neixón xa é referente galego