«É incrible que aínda non haxa conciencia de que hai que poñer guantes ao entrar»

No seu medio século de vida, en Supernito nunca viviran unha situación parecida e, coma todos os negocios de alimentación, afronta esta crise aberto ao público e tomando as medidas de protección necesarias. Só piden «que a xente compre con responsabilidade, se non che fai falta non saias da casa».

-O día 13 de marzo xa controlaban o aforo e había colas á porta do supermercado. Pensaban que un mes despois seguirían igual?, ata cando cre que se vai dilatar esta situación?

-Se che digo a verdade, si, e, por desgraza, penso que nos van ter así ata primeiros de xuño.

-Que cambiou desde ese día?

-Moitas cousas. En primeiro lugar a actitude do cliente cara nós e de nós cara ao cliente. Aínda que os clientes son os de sempre e hai moita diplomacia e retranca galega, hai máis desconfianza, hai ansiedade, todo o mundo está máis precavido ante posibles contaxios.

-Acabouse a charla no súper?

-Penso que a xente quere falar e achegarse, a xente necesita o contacto social, pero as medidas que nos impoñen obrigan a manter a distancias.

-Ir ao supermercado é para moitas persoas o único momento do día no que saen da casa...

-E moitos aproveitan iso para relacionarse, pero, na cola, a xente non se achega e intenta moderarse. O que é incrible é que cometamos todos os días os mesmos erros, que non haxa conciencia de que hai que poñer os guantes ao entrar nun establecemento público cando os teñen á súa disposición, igual que o desinfectante.

-Que porcentaxe diría vostede que incumpre as normas?

-Entre un 10 ou 15 %.

-A como o xustifican?

-Dinche que se esqueceron ou que non o sabían... Parece mentira que sigamos así con toda a información que hai.

-Tiveron algún conflito?

-En ningún momento, a xente foi moi respectuosa desde o primeiro día que tomamos medidas.

-Como mudaron os hábitos de consumo?

-Nós traballamos unha sección que é a hostalería e nos afectou moito, porque representa o 30 ou 40 % da nosa facturación. O que creceu foi a carnicería.

-Que demanda a xente?

-Ao principio, todo o mundo pedía hamburguesas, agora empezan a levar tamén chuletas para asar na casa, sobre todo cando o tempo se presta.

-A carnicería é un dos sectores beneficiados nesta crise?

-Non é que se venda máis, o que hai é máis traballo, porque antes un restaurante levaba dous chuleteros enteiros de tenreira de 40 quilos e agora temos que partilo por unidade. Igual pasa cos elaborados: pinchos, hamburguesas, roliños de carne, costela adobada, chourizo e criollos.

-O que tamén se está vendendo moito é froita ¿non?

-Si, a froita agora está moi demandada, hai quen se queixa porque non atopa plátanos maduros..., e que non dá tempo.

-A que atribúe esta tendencia?

-Ao estar na casa non te moves e tes que comer máis san, non podes encherte de snacks e galletas. A primeira semana foi espectacular, todo o mundo levaba pipas e palomitas. Grazas a todo isto moita xente está aprendendo a cociñar e, como di meu pai, sérvenos para unha cura de humildade, de consumo, e para valorar máis o campo, que está moi abandonado e é de onde vimos.

-Como andan de papel hixiénico?

-Nós en ningún momento quedamos sen el nin sen fariña, aínda que agora falta fariña de forza e levadura porque as fábricas están restrinxindo a produción. O único que non temos é alcohol.

-Cal é o perfil do cliente agora?

-Dunha media de idade entre 25 e 60 anos. Non ves un neno nin a xente maior.

-Supernito presume de ser de aldea, vai servir esta crise para revalorizar o comercio de proximidade?

-A tenda pequena vai levar desta crise un pequeno avance, aínda que non todo o que debería. A xente, por medo, non vai a moitos quilómetros a comprar, vai a tenda de barrio.

---

---

---