O conxunto vilagarcián encaixou un 103-73 do poderoso Perfumerías Avenida Xoborg
05 oct 2025 . Actualizado a las 05:00 h.A onda de ilusión coa que co Sigaltec CLB encaraba onte o primeiro partido en 16 anos dun equipo vilagarcián en categoría nacional masculina acabou rompéndose contra o muro da realidade. Neste caso, o construído polo cadro de xogadores de luxo para a Tercera FEB levantado polo presuposto do Perfumerías Avenida Xoborg, un dos claros favoritos desde o primeiro minuto a pelexar por xogar a vindeira temporada unha categoría por riba. 103-73 foi o resultado final do paso do equipo que dirixe Luis Gabín polo parqué da pista anexa ao Pavillón Municipal Wurzburg de Salamanca.
Con todo, o Sigaltec deixou unha pulcra imaxe mentres aguantou o limitado físico dun equipo da casa, feito case ao cento por cento con xogadores de Vilagarcía e da contorna. Ata o punto de tutear o seu poderoso anfitrión no primeiro cuarto, pechado cun 29-24. A explosiva saída á cancha de Pablo Fernández, facéndolle a vida imposible á defensa local no un para un, xerando para todo o seu equipo e anotando, e a complicidade de Óscar Castaño con dous triplos sorprendeu de inicio. Pablo remataría con 25 puntos e Óscar con 26, pero os tiros desta volta non ían por aí.
Bastou que a gasolina comezase a escasear no treito final do segundo cuarto para que o Sigaltec sangrase polas costuras que se lle abrían no rebote defensivo. As 20 capturas baixo o seu propio aro palideceron fronte as 22 acaparadas polo Perfumerías Avenida, que conseguiu unha moi alta porcentaxe da súa anotación con fáciles canastras nacidas da vantaxe de rebotear a curta distancia do taboleiro visitante.
Os 12 puntos abaixo cos que chegou o conxunto vilagarcián ao descanso (49-37) subiron a 22 cando tocou encarar o derradeiro cuarto (82-60). Co partido roto, Luis Gabín optou por dosificar ao máximo aos contados homes cos que pode contar para xogar por dentro nunha Liga na que deberá buscar como compensar a súa falta de centímetros.
FICHA DO PARTIDO:
PERFUMERÍAS AVENIDA XOBORG (103): Smith (19), Garrido (8), Mc Carthy (19), Kourouma (9) y Choithramani (16) —quinteto titular—; Hernández (20), Peters (2), Sánchez Parres, González (10), Roa, Sánchez Ollero e Palacios.
SIGALTEC CLB (73): Óscar Castaño (26), Jorge Rodríguez, Pablo Fernández (25), Miguel Gil (5) e Adrián Kovac (7) —quinteto titular—; Mateo Bello (6), Santórum, Serqueira, Sabugueiro, Caamaño, Rey (1) e Monteagudo (3).
PARCIAIS (E MARCADOR) CADA CUARTO: 29-24, 20-13 (49-37 ao descanso); 33-23 (82-60) e 21-13 (103-73, resultado final).
ÁRBITROS E PERSOAIS: Isidoro Sánchez e Gonzalo de los Bueis. Sinaláronlle 24 faltas ao Perfumerías Avenida Xoborg e 28 ao Sigaltec CLB. Sen eliminados.