A primeira promoción de BUP no antigo instituto Calvo Sotelo de Vilagarcía cumpre medio século

Hoxe vai levarse a cabo unha festa por todo o alto, Vilagarcía vai celebrar 50 anos da primeira promoción do Bacharelato Unificado Polivalente (BUP) no actual IES Castro Alobre. Acondicionando o salón de actos do centro especialmente para a ocasión, aquela xeración de estudantes relembrará os seus días no ámbito educativo nun acto que se desenvolverá ás 11.30 horas.

Pasaron anos, aconteceron cambios e os espazos e persoas non son os mesmos xa que, sen importar onde os levasen os camiños da vida, os excompañeiros non esquecen esta data para compartir as súas memorias. Hai medio século dende a obtención do título por parte desta promoción, chamada «da transición», que estudaba nun centro co nome de Calvo Sotelo. Grazas á lei ministerial de 1970 facilitouse o acceso gratuíto ao bacharelato a unha ampla base social; sen diferenzas cursábase o BUP. Os cambios tamén se atopaban nas aulas onde, en setembro de 1975, 161 alumnos se distribuían de forma mixta na comarca do Salnés e deixarían de contar coa formación no denominado Espíritu Nacional que rexía ata ese momento.

Os alumnos foron o reflexo de España, mentres eles atravesaban a adultez o país maduraba nun período de catro anos convulsos nos que —de 1975 a 1979— vivía a morte de Franco, as primeiras eleccións democráticas, a implantación da maioría de idade aos 18 anos e a aprobación da Constitución. Por todo iso, a promoción reúnese para celebrar o seu recordo acompañados dos antigos profesores (algúns dos que xa superan o seu propio centenario), a dirección do instituto, o conselleiro de Educación Román Rodríguez, e Alberto Varela, alcalde de Vilagarcía.

---

---

---