Son estes días de moito traxín na fábrica de Larsa en Vilagarcía. Especialmente para Sabela Oca, a súa responsable de Calidade, que non deixa de conceder entrevistas.
-Semella arriscado lanzarse cun sabor tan arraigado.
-Si, pero sobre todo porque non hai referencias coas que compararte. Non hai un sabor contra o que testar. Dito isto, lembrar que hai tempo que innovamos con sabores coma cereixa, kiwi, figo ou abelá.
-¿Podemos falar da receita?
-Podemos falar de que é un produto natural, só leite galego e cultivos, nada de espesantes nin xelatinas, sen elementos alcohólicos, que se integra na nosa liña de sobremesas. Tamén de que foi moi complicado acadar un equilibrio entre a acidez do iogur e o sabor a café.
-¿Sobremesa? ¿Cal é a diferenza cos iogures?
-Si, a xente pregunta por isto. As nosas sobremesas son iogures, pero con características máis coidadas, cunha textura máis suave e cremosa e un preparado de café que vai un pouco máis aló.
-E con tanto bombo ¿cre que o licor café pode superar á vainilla?
-O que está pasando co sabor de licor café é incrible, pero sinceramente o iogur de vainilla é insuperable. É como a nosa Coca Cola, algo de verdade imbatible. Aquí si hai con quen compararse e sempre saímos gañando.
-Da fórmula tampouco nin falar, claro.
-Nin falar. É segredo.
-¿E isto de botarlle unhas gotas ao iogur? ¿Que lle parece?
-En Galicia é moi tradicional botarlle unha pinga ao café... Iso é cousa da imaxinación da xente.