O concurso fallarase esta semana e hai 325 euros en premios
04 ene 2022 . Actualizado a las 14:45 h.O concurso de beléns que organiza o Concello de Valga conta con catro participantes; Celia Rincón, en Pontenova, que presenta unha montaxe con máis de 150 figuras dispostas nunha superficie duns cinco metros. Todas as pezas están feitas a man por ela mesma con arxila e arame, cunchas, pedras, tella e area.
Fran e Juan Otero Lobato, veciños de Laxes (Cordeiro), repiten un ano máis neste concurso, cunha montaxe duns doce metros cadrados de superficie na que colocaron máis de 150 pezas, das que as casas están feitas artesanalmente. Conta con luz, auga e incorpora este ano novas escenas coma a procesión da Virxe das Dores e unha homenaxe a La Palma con un volcán en erupción.
En Beiro, Sarai Vilas López ideou unha orixinal disposición con algunhas escenas repartidas polo tronco e as pólas dunha árbore e unidas por pontes colgantes. A outra parte do nacemento está colocado ao pé do tronco, con distintos ambientes separados por estruturas de cortiza.
Francisco Barreiro, veciño do Sixto, tamén compite por iniciativa das súas netas cun pequeno pero curioso belén que completa a impresionante decoración de Nadal do seu xardín.
O concurso fallarase a mediados desta semana e hai 325 euros en premios; un primeiro, un segundo e un terceiro.