O cadro meañés ten a posibilidade de reengancharse á pelexa polo subcampionato de Liga
21 ene 2023 . Actualizado a las 05:00 h.Segunda xornada de Liga do 2023 para o Inelsa Solar Asmubal Meaño e primeira comparecencia do cadro de Juan Costas perante a súa afección no Pavillón Municipal de Coirón-Dena (20 horas) desde o cambio de ano. Cun encontro do máis interesante, á par ca esixente. Diante, o Oliveira & Faro Seaplast Cañiza, quinto clasificado con 18 puntos no seu haber.
O Asmubal Meaño ten ante si a oportunidade de igualar na táboa o seu adversario e, deste xeito, reengancharse á carreira de fondo polo subcampionato —o título é cousa do Lanzarote—, con oito equipos en 6 puntos con 22 inda por disputar.
A cuestión é que vencer ó Seaplast Cañiza non é cuestión menor. E se non, que llelo digan aos seus seis últimos rivais de Liga no 2022, todos eles derrotados polo club do sur de Pontevedra. Houbo que agardar ao cambio de ano e a un derbi, o que o enfrontou a semana pasada co AD Carballal, para ver o sexto tropezo da Cañiza esta temporada, na que suma nove partidos gañados e seis perdidos, sen ningún empate.
A perigosidade do seu rival hoxe para o Asmubal é maior polo seu estilo de xogo. As de Juan Costas levan toda a semana preparando como atacar a defensa aberta en 5-1 do Seaplast Cañiza, que endurece coa pelexa das súas xogadoras por cada balón en disputa.
O adestrador do Asmubal confía en que a afección do equipo responda hoxe e axude a empurralo cara adiante cun par de centos de voces de ánimo. A boa nova, a ausencia de baixas nas filas locais, nas que hai ganas de sumar o primeiro triunfo do 2023 tras a derrota na cancha do Hand Vall Valladolid, segundo clasificado.