Das declaracións das testemuñas

Os feitos máis sobranceiros da revolta de 1717 en San Vicente ocorreron entre o cinco e o dez de setembro


Os feitos máis sobranceiros da revolta de 1717 en San Vicente ocorreron entre o cinco e o dez de setembro: organizáronse partidas para vixiar accesos por mar e terra; fixéronse recuar aos gardas da Lanzada; interceptáronse comunicacións; asaltouse a Casa da Fonte dúas veces; elimináronse probas de débedas; condenouse a desterro e feriuse ao señor e tentáronse acordos con el ata que quedou ceibo e querelouse desde Santiago. Só oito días despois, o terrorífico instrutor Joseph de Erze y Miranda, murciano, saíu de Compostela con gardas, para acalar esta insurrección contra o statu quo e coa pérfida precaución de anotar os traballos que ía encomendando para cobralos en bens dos acusados, fosen ou non culpables. Devastador. O dezanove, en Padrón, escoitou a versión do escribán Joseph de la Yglessya e dos criados de Sánchez Portocarrero. O vinte chegou a Vilagarcía, onde coincidiu cunha visita do Arcebispo a quen lle explicou a onde ía. Esa noite durmiu en Cambados e arribou ao Grove o vinte e un. Asentouse alí e empezou a tomar declaracións, conforme os alguacís ían apresando primeiro mulleres e despois vellos. Elas dixeron que oíran falar dos feitos indo embarcadas para Cambados pero que en San Vicente non se soara cousa algunha, nin chío. A taberneira, que a noite do asalto servira viño na Casa da Fonte, dixo que «no a pasado lo que su ilustrísimo le pregunta ni menos a llevado ningún bino y que su casa de avitación está cerca de la de Don Joseph pero que no save ni percibió nada». O Capitán de Valga aportou como testemuñas aos convidados na súa casa, a un garda das salinas, de Valga, e ao seu representante, de Vilalonga, quen lle atendía intereses nas salinas e na parroquia. Escoitados estes achegados do señor, o vinte e tres o xuíz «mandava y mandó despachos de prisión» contra máis de trinta «vezinos de esta felegresía de San Vicente del Grove con embargo y averiguación de todos sus vienes sin perjuizio de proceder contra los más cómplices», pero so foi quen de encerrar no cárcere do Grove a nove, a maioría anciáns. Os demais acusados botáronse ao monte. E os que declararon entón presentaron coartadas: ou «que el día domingo que le pregunta estubo en la Feria que llaman de la Portela a dónde avía ydo desde el sávado y bolvió el lunes al medio día», ou que «aunque bive cercano a la casa que en esta aldea da Fonte tiene el querellante como a un tiro de mossquette, no a visto, savido ni tenido la menor noticia de lo que contiene dicha querella». Cando a comitiva xudicial aparecía por San Vicente, os homes esfumábanse: «llegando al lugar buscando en él sus vezinos para examinarles, no fue visto ningún hombre y reparando al monte ynmediato entre unos peñascos se bieron dos hombres que hiban huiendo, a los quales mandó siguisen los ministros que le asisten. Que les dieron alcanze a los quales trajeron a su presencia». Un, finxiuse mudo. O dous de outubro o xuíz decidiu volver a Santiago e levar aos presos en lancha ata Padrón, atados polos pulsos con esposas que achegou o Alcalde do Grove e que cobraría cos bens dos encadeados.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
20 votos
Comentarios

Das declaracións das testemuñas